​អេ​ត្យូ​ពី៖ ប្រទេស​អាល្លឺម៉ង់ និង​បារាំង​បាន​ក្លាយ​ជា​ប្រទេស​ចុងក្រោយ​បំផុត​ ដែល​ណែនាំ​ពលរដ្ឋ​របស់​ខ្លួន​ឱ្យ​ចាក​ចេញពី​ប្រទេស​អេ​ត្យូ​ពី ស្រប​ពេល​សង្គ្រាមស៊ីវិល​របស់​ប្រទេស​ចេះតែ​បន្ត​កើន​ឡើង​។​ ថ្មីៗ​នេះសហរដ្ឋអាមេរិក និង​ចក្រភព​អង់គ្លេស​ក៏បាន​ចេញ​សេចក្ដី​ណែនាំ​ផង​ដែរ ហើយ​អង្គការ​សហប្រជាជាតិ​បាន​ចាប់ផ្ដើម​នូវ​អ្វី​ដែល​ខ្លួន​ពិពណ៌នា​ថា​ ជា​ការ​ផ្លាស់​ទីលំនៅ​បណ្ដោះអាសន្ន​សម្រាប់​បុគ្គលិក​មួយ​ចំនួន​។

​ការ​ជំរុញ​នេះ​កើតឡើង ខណៈ​ក្រុម​ឧទ្ទាម Tigray និយាយ​ថា ​ពួកគេ​នៅតែ​បន្ត​វាយ​សម្រុក​រុល​ទៅ​កាន់​រដ្ឋធានី Addis Ababa​។​ លោនាយក​រដ្ឋមន្ត្រី Abiy Ahmed និយាយ​ថា លោក​នឹង​ទៅកាន់​ជួរមុខ​ដើម្បី​ប្រឈម​នឹង​ពួក​ឧទ្ទាម​។​ ជម្លោះ​អូស​បន្លាយ​រយៈពេល​មួយ​ឆ្នាំ​បាន​បង្ក​ឱ្យ​មាន​វិបត្តិ​មនុស្សធម៌ ដោយ​មនុស្ស​រាប់​សែន​នាក់​ប្រឈម​នឹង​ស្ថានភាព​ធ្ងន់ធ្ងរ ​ប្រៀប​បាន​នឹង​គ្រោះ​ទុរ្ភិក្ស​នៅ​ភាគ​ខាងជើង​នៃ​ប្រទេស​អេ​ត្យូ​ពី​។ មនុស្ស​រាប់​ពាន់​នាក់​បាន​ស្លាប់ និង​រាប់​លាន​នាក់​បង្ខំចិត្ត​ចាក​ចេញ​ពី​ផ្ទះ​សម្បែង​រប​ស់​ពួកគេ​។​

​បេសកជន​ពិសេស​របស់​សហរដ្ឋអាមេរិក​លោក Jeffrey Feltman បាន​និយាយ​ថា ស្ថានភាព​ដែល​ចេះ​​តែ​វិវត្តន៍​ទៅមុខ​នេះ កំពុង​ត្រូវ​បាន​បង្កើត​ឡើង​ឆ្ពោះ​ទៅ​រក​ដំណោះស្រាយ​ការទូត ប៉ុន្តែ​ដំណើរ​ការ​នេះ​ត្រូវ​បាន​រង​ការ​គំរាមកំហែង​ ដោយសារតែ​ការ​កើន​ឡើង​នៃ​ការ​វាយ​ប្រយុទ្ធ​គ្នា​។​ លោក​បាន​និយាយ​ថា ភាគី​ទាំងពីរ​ហាក់​ដូច​ជា​ជឿ​ជាក់​ថា ​ពួកគេ​ស្ថិត​នៅ​លើ​ចំណុចកំពូល​នៃ​ជ័យជម្នះ​ខាង​យោធា​រៀង​ៗ​ខ្លួន។​ លោក Feltman បាន​ព្រមាន​ថា ប្រសិនបើ​ពួក​ឧទ្ទាម​បាន​​ឈាន​ទៅ​ដល់​ការ​គ្រប់គ្រង​លើ​ទីក្រុង Addis Ababa នោះ​ជា​រឿង​មិន​អាច​ទទួល​យក​បាន និង​ជា​មហន្តរាយ​៕

អត្ថបទ៖ សុខមាន