ឆ្មាំល្បាតឆ្នេររបស់ប្រទេសចិន នៅថ្ងៃពុធ (ទី៥ ខែមីនា) នេះ បានប្រាប់ឲ្យដឹងថា ខ្លួនបានតាមមើលយ៉ាងដិតដល់ ចំពោះទូកជនស៊ីវិលហ្វីលីពីនដែលផ្តល់ការផ្គត់ផ្គង់ប្រចាំថ្ងៃដល់នាវាចម្បាំង «ចតចោលដោយខុសច្បាប់» នៅឯតំបន់មានជម្លោះ គឺតំបន់ថ្មប៉ប្រះទឹក Second Thomas Shoal កាលពីថ្ងៃទី៤ ខែមីនា។

គួរបញ្ជាក់ថា ប្រទេសចិន និងហ្វីលីពីន ទាមទារដែនដីនេះ ហើយតែងតែប៉ះទង្គិចគ្នាជាញឹកញាប់ ក្នុងដែនទឹកជុំវិញ។ នៅមុននេះ បេសកកម្មផ្ដល់ការផ្គត់ផ្គង់នូវសម្ភារប្រើប្រាស់ចាំបាច់ដល់ទាហាន នៅលើនាវាកងទ័ពជើងទឹកចតចោល គឺជាមូលហេតុដ៏សំខាន់នៃភាពតានតឹង រវាងប្រទេសទាំង២ រហូតដល់ពួកគេឈានដល់កិច្ចព្រមព្រៀងបណ្តោះអាសន្ន ក្នុងខែកក្កដា ឆ្នាំ២០២៤ ជុំវិញបេសកកម្មបែបនេះ ដែលជាសញ្ញានៃការបន្ថយភាពតានតឹង។

កាលពីខែមករា ប្រទេសទាំង២ ក៏បានយល់ព្រមស្វែងរកមូលដ្ឋានរួម និងស្វែងរកមធ្យោបាយសហការ បើទោះបីជាមានការខ្វែងគំនិតគ្នា ជុំវិញដែនដីរបស់ពួកគេក៏ដោយ។

នៅក្នុងសេចក្តីថ្លែងការណ៍ នាថ្ងៃពុធ (ទី៥ ខែមីនា) នេះ ឆ្មាំល្បាតឆ្នេរចិន បានលើកឡើងថា ប្រទេសចិនជំរុញឲ្យហ្វីលីពីនគោរពការប្តេជ្ញាចិត្តរបស់ខ្លួន បញ្ឈប់បង្កើនការបំភាន់នូវឧប្បត្តិហេតុ នៅក្នុងតំបន់នេះ ហើយធ្វើការជាមួយប្រទេសចិន ដើម្បីគ្រប់គ្រងស្ថានភាពដែនសមុទ្រ។

ចំណែកកងកម្លាំងប្រដាប់អាវុធហ្វីលីពីន បានប្រាប់ឲ្យដឹងថា ខ្លួនបានបញ្ចប់បេសកកម្មឆា្លស់វេនកងទ័ពជាប្រចាំ និងការផ្ដល់គ្រឿងសម្ភារប្រើប្រាស់ដល់នាវាចម្បាំង BRP Sierra Madre ដែលចតចោល នៅតំបន់ថ្មប៉ប្រះទឹក «ដោយប្តេជ្ញាចិត្តយ៉ាងមុតមាំ ក្នុងការបន្តរក្សាវត្តមាន និងការត្រៀមធ្វើប្រតិបត្តិការ នៅសមុទ្រហ្វីលីពីនខាងលិច»៕