បេសកជនអង្គការសហប្រជាជាតិសម្រាប់សាធារណរដ្ឋអារ៉ាប់ស៊ីរីកាលពីថ្ងៃអង្គារ បានថ្កោលទោសយ៉ាងដាច់ខាតចំពោះ«ការកើនឡើងភាពតានតឹងផ្នែកយោធារបស់អ៊ីស្រាអែល រួមទាំងការវាយប្រហារតាមអាកាស» ទៅលើប្រទេសជិតខាងភាគខាងជើងរបស់ខ្លួន។

ប្រព័ន្ធផ្សព្វផ្សាយរដ្ឋស៊ីរី បាននិយាយថា អ៊ីស្រាអែលបានវាយប្រហារទៅលើតំបន់ Tartus កាលពីថ្ងៃចន្ទ បន្ទាប់ពីអ្នកឃ្លាំមើលសង្គ្រាម បានរាយការណ៍ពីការបំផ្ទុះនៅជិតកំពង់ផែក្រុង ហើយកងទ័ពអ៊ីស្រាអែលបានអះអាងថា ខ្លួនបានវាយប្រហារ «ទីតាំងយោធា» មួយទៀត នៅចុងខាងជើង។

ការថ្កោលទោសនេះ បានកើតឡើង បន្ទាប់ពីអ៊ីស្រាអែល បានធ្វើការវាយប្រហារតាមអាកាសរាប់រយលើក ក្រោយពីការវាយលុកដែលដឹកនាំដោយក្រុមឥស្លាមនិយម បានទម្លាក់ប្រធានាធិបតីលោក បាសា អាល់អាសាដ ( Bashar al-Assad) ពីអំណាច នៅក្នុងខែធ្នូ ជាអ្វីដែលខ្លួនបាននិយាយថា គឺជាកិច្ចប្រឹងប្រែង ដើម្បីការពាគ្រឿងយុទ្ធោបករណ៍របស់ស៊ីរីពីការធ្លាក់ចូលទៅក្នុងដៃរបស់គូប្រជែង។

អ៊ីស្រាអែល បានបញ្ជូនកងទ័ពចូលទៅក្នុងតំបន់ទ្រនាប់ ដែលយាមល្បាតដោយអង្គការសហប្រជាជាតិ ដែលបានខណ្ឌចែកកងកម្លាំងអ៊ីស្រាអែល និងស៊ីរី នៅលើតំបន់យុទ្ធសាស្ត្រ Golan Heights ចាប់តាំងពីឆ្នាំ ១៩៧៤ ។

បេសកជនអង្គការសហប្រជាជាតិទទួលបន្ទុកស៊ីរី លោក Geir Pedersen បាននិយាយកាលពីថ្ងៃអង្គារថា លោកមានការព្រួយបារម្ភយ៉ាងខ្លាំងចំពោះការបន្តរំលោភលើកិច្ចព្រមព្រៀងបញ្ចប់សង្គ្រាមឆ្នាំ ១៩៧៤។