ឧត្ដរមានជ័យ ៖ នៅរសៀលថ្ងៃ ទី៥ ខែមីនា ឆ្នាំ២០២៥នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ភរិយាប្រធានព្រឹទ្ធសភា និងជាប្រធានកាកបាទក្រហមកម្ពុជា អញ្ជើញជួបសំណេះសំណាល កងកម្លាំងឈរជើងការពារតាមខ្សែបន្ទាត់ព្រំដែន ចំនួន៤០កង ក្នុងភូមិសាស្ត្រខេត្តឧត្តរមានជ័យ ដែលពិធីនេះប្រព្រឹត្តទៅ នៅទីបញ្ជាការវរសេនាតូចលេខ៤១១ នៃកងពលតូចថ្មើរជើងលេខ៤១ ស្ថិតក្នុងភូមិទួលស្វាយ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។

ពិធីនេះមានការអញ្ជើញចូលរួមពី ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តឧត្តរមានជ័យ, ឯកឧត្តម នាយឧត្តមសេនីយ៍ ហ៊ីង ប៊ុនហៀង មេបញ្ជាការនៃបញ្ជាការដ្ឋានអង្គរក្ស, ព្រមទាំងថ្នាក់ដឹកនាំ និងតំណាងកងកម្លាំងឈរជើង ការពារតាមខ្សែបន្ទាត់ព្រំដែនចំនួន៤០កង អញ្ជើញចូលរួមផងដែរ។

ក្នុងឱកាសនោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មានប្រសាសន៍ថា ក្នុងនាមជាភរិយាប្រធានព្រឹទ្ធសភា ពិតជាមានកិត្តិយស និងក្តីសោមនស្សរីករាយ បានជួបសំណេះសំណាលសួរសុខទុក្ខ កងកម្លាំងឈរជើងការពារព្រំដែនទាំង៤០កង ឯកភាព នៅទីបញ្ជាការ និងវរៈសេនាតូចលេខ៤១១ នៃកងពលតូចថ្មើជើងលេខ៤១ ក្នុងឱកាសបំពេញ បេសកម្មមនុស្សធម៌ នៅក្នុងទឹកដីខេត្តឧត្តរមានជ័យ ពីថ្ងៃទី៥ដល់ទី៦ ខែមីនា២០២៥នេះ។ សម្តេចសូមថ្លែងនូវកត្តញ្ញូតាធម៌ យ៉ាងជ្រាលជ្រៅ ជាទីបំផុត និងការកោតសសើរយ៉ាងស្ញប់ស្ញែង ចំពោះវីរភាពដ៏អង់អាចក្លាហាន និងឆន្ទមនសិការស្នេហា៍ជាតិ មាតុភូមិរបស់បងប្អូនរួមជាតិ ដែលជាកងកម្លាំងការពារព្រំដែនទាំងអស់ ក្នុងការតស៊ូ និងលះបង់ក្រុមគ្រួសារជាទីស្រឡាញ់ ដើម្បីបុព្វហេតុការពារបូរណភាពទឹកដី អធិបតេយ្យជាតិ ការពារឯកភាពជាតិ សន្តិសុខ ស្ថេរភាព នៃ ព្រះរាជាណាចក្រកម្ពុជា ក្រោមម្លប់ជាតិ សាសនា ព្រះមហាក្សត្យ។ ក្នុងឱកាសដ៏វិសេសវិសាលនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញផ្តល់កិត្តិយសដ៏ខ្ពង់ខ្ពស់ ចុះហត្ថលេខាលើសៀវភៅក្រាំងមាស បំពាក់គ្រឿងឥស្សរិយយស ជូនមេបញ្ជាការកងពលតូចចំនួន៥ ព្រមទាំងឧបត្ថម្ភថវិកា ដល់កងកម្លាំងឈរជើងការពារ តាមខ្សែបន្ទាត់ព្រំដែនចំនួន៣៥ កង / វរៈ សរុបស្មើនឹង៥២៥លានរៀល។ ដោយឡែកជូនយោធាស្រុកចំនួន៥ សរុបនឹង២៥លានរៀល។

សូមជម្រាប់ថាបន្ទាប់ពីជួបសំណេះសំណាលសួរសុខទុក្ខ ជាមួយកងកម្លាំងឈរជើងការពារតាមខ្សែបន្ទាត់ព្រំដែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងគណៈប្រតិភូ បានបន្តដំណើរ អញ្ជើញក្នុងពិធីដាំដើមឈើ និងសម្ពោធផ្លាកឧទ្យាន កាកបាទក្រហមកម្ពុជា ដែលស្ថិតក្នុងភូមិថ្មី ឃុំត្រពាំងតាវ ស្រុកអន្លង់វែង ខេត្តឧត្តរមាន   ជ័យ។ ឧទ្យាននេះគឺជាឧទ្យានទី៣ របស់កាកបាទក្រហមកម្ពុជា ដែលបានបង្កើតឡើង និងចាប់ផ្តើមដាំដើមឈើប្រណិតចំនួន១.៥០០ដើម ក្នុងឱកាសអបអរសាទរ ការបោះជំរំយុវជន កាកបាទក្រហមកម្ពុជា ថ្នាក់ជាតិ និងអន្តរជាតិ កាលពីថ្ងៃទី៣០ ខែវិច្ឆិកា ឆ្នាំ២០២៤កន្លងទៅ។

សូមជម្រាបថាកាកបាទក្រហមកម្ពុជា ធ្វើសកម្មភាពមនុស្សធម៌ គឺពិតជាកម្លាំងចូលរួមមិនអាចខ្វះបានឡើយ ក្នុងការការពារបរិស្ថាន, ធនធានព្រៃឈើ និងក្នុងយុទ្ធនាការពង្រីក នូវប្រព័ន្ធជីវវិទ្យា សម្រាប់ការពារ និងស្តារឡើងវិញនូវព្រៃឈើ ប្រកបដោយខ្យល់បរិសុទ្ធ និងបរិស្ថានបៃតង ដើម្បីសុខុមាលភាពមនុស្សជាតិ៕

អត្ថបទៈ សំ ងីម