ក្រុមហ៊ុនអាកាសចរណ៍ធំមួយរបស់ប្រទេសថៃ កំពុងផ្អាកជើងហោះហើរ រវាងទីក្រុងបាងកក និងខេត្តភាគខាងជើងរយៈពេលជាង ១ខែ ដោយសារការមើលមិនសូវឃើញល្អ ដែលបណ្តាលមកពីខ្យល់បរិយាកាសកខ្វក់។ នេះបើតាមការបញ្ជាក់ឲ្យដឹងពីក្រុមហ៊ុនអាកាសចរណ៍ នៅថ្ងៃពុធ (ទី៥ ខែមីនា)។

គួរបញ្ជាក់ថា ការបំពុលបរិយាកាស កើនឡើងនៅប្រទេសថៃ ជាពិសេសភាគខាងជើង ចន្លោះខែធ្នូ និងខែមេសា ខណៈដែលកសិករដុតគល់ជញ្ជ្រាំង ដើម្បីរៀបចំដី សម្រាប់រដូវដាំដុះបន្ទាប់។

ក្រុមហ៊ុនអាកាសចរណ៍ ក្នុងស្រុក Bangkok Airways កំពុងផ្អាកជើងហោះហើរ ពីទីក្រុងបាងកកទៅកាន់ទីក្រុង Mae Hong Son ភាគពាយ័ព្យ ដោយសារផ្សែងអ័ព្ទ ត្រូវបានគេរំពឹងថា នឹងធ្វើឲ្យការមើលឃើញមិនសូវល្អ ដែលលំបាកដល់ការចុះចតរបស់យន្តហោះ។

មន្ត្រីអាកាសចរណ៍ Bangkok Airways នៅអាកាសយានដ្ឋាន Mae Hong Son បានប្រាប់ឲ្យដឹងថា៖ «យើងបានជួបប្រទះបញ្ហាដូចគ្នា (ក្នុងឆ្នាំ២០២៤) នៅពេលដែលកម្រិតផ្សែងអ័ព្ទមានកម្រិតខ្ពស់ខ្លាំង»។

អាជ្ញាធរអាកាសយានដ្ឋាន នៅ Mae Hong Son ដែលជាគោលដៅទេសចរណ៍ដ៏ពេញនិយម សម្រាប់អ្នកទេសចរផ្សងព្រេង នៅភាគខាងជើងប្រទេសថៃ បានប្រកាសនៅលើបណ្ដាញសង្គម Facebook កាលពីសប្តាហ៍មុនថា ជើងហោះហើរនឹងត្រូវបានផ្អាក ចាប់ពីថ្ងៃទី១៤ ខែមីនា ដល់ថ្ងៃទី២០ ខែមេសា។

យោងតាមទិន្នន័យរបស់ក្រុមហ៊ុន IQ Air ដែលវាស់ស្ទង់ការបំពុលបរិយាកាសសកល បានបង្ហាញថា សន្ទស្សន៍គុណភាពខ្យល់ សម្រាប់ទីក្រុង Mae Hong Son គឺខ្ពស់ជាងគោលការណ៍ណែនាំរបស់អង្គការសុខភាពពិភពលោក ៧,៩ដង៕