ប្រធានាធិបតី លោក Emmanuel Macron ចង់បង្កើនការចំណាយលើវិស័យការពារជាតិរបស់បារាំង ខណៈដែលទីក្រុងវ៉ាស៊ីនតោន គំរាមដកការធានាសន្តិសុខរបស់ខ្លួន ចំពោះតំបន់អឺរ៉ុប ប៉ុន្តែស្របពេលដែលរដ្ឋាភិបាលរបស់លោកប្រែងប្រែងទប់ឱនភាពដ៏ពិបាកគ្រប់គ្រងនោះ ការផ្តល់មូលនិធិដល់ផែនការនេះ នឹងមិនងាយស្រួលនោះឡើយ។

ដោយមានឱនភាពថវិកាដ៏ធំបំផុតមួយ ក្នុងចំណោមប្រទេស នៅសហភាពអឺរ៉ុប (EU) ប្រទេសបារាំងកំពុងស្ថិតនៅក្រោមសម្ពាធកាន់តែខ្លាំងឡើងៗ ដើម្បីគ្រប់គ្រងការចំណាយរួម ហើយទើបតែបានអនុម័តថវិកាឆ្នាំ២០២៥ របស់ខ្លួន កាលពីខែមុន បន្ទាប់ពីបានពន្យារពេលជាច្រើនសប្តាហ៍ នៅក្នុងសភា ដែលមានការបែងបាក់យ៉ាងខ្លាំងក្លា។

ឥឡូវនេះ បញ្ហាប្រឈមផ្នែកភូមិសាស្ត្រនយោបាយ ដែលបណ្តាលមកពីការមានទំនាក់ទំនងគ្នាឡើង រវាងប្រធានាធិបតីអាមេរិក លោក Donald Trump និងរុស្ស៊ី ហើយការផ្អាកជាបណ្តោះអាសន្ន ជុំវិញជំនួយយោធាដល់អ៊ុយក្រែន ទំនងជានឹងនាំឲ្យមានសម្ពាធថ្មីលើការប្តេជ្ញាចិត្ត ក្នុងការកាត់បន្ថយការចំណាយរបស់បារាំង។

នៅក្នុងកំណត់ត្រាស្រាវជ្រាវមួយ ទីភ្នាក់ងារ Scope Ratings បានឲ្យដឹងថា៖ «ប្រទេសបារាំងកំពុងឆ្ពោះទៅរកការផ្លាស់ប្ដូរការចំណាយដ៏លំបាក ក្នុងការដោះស្រាយការប្តេជ្ញាចិត្តរបស់រដ្ឋាភិបាល ដើម្បីកាត់បន្ថយឱនភាពថវិកា ស្របពេលត្រូវបង្កើនការចំណាយលើវិស័យការពារជាតិ»៕