នាយកសេវាចារកម្មអាមេរិក CIA លោក John Ratcliffe បាននិយាយកាលពីថ្ងៃពុធ (០៥ មីនា) ថា សហរដ្ឋអាមេរិក បានផ្អាកការចែករំលែកព័ត៌មានសម្ងាត់ជាមួយអ៊ុយក្រែន ដោយបានបង្កើនសម្ពាធកាន់តែខ្លាំងលើប្រធានាធិបតីអ៊ុយក្រែន លោក Volodymyr Zelenskiy ឱ្យសហការជាមួយលោកប្រធានាធិបតីអាមេរិក Donald Trump ក្នុងការកោះប្រជុំសន្តិភាពជាមួយរុស្ស៊ី។

ការផ្អាកនេះ អាចធ្វើឱ្យមនុស្សស្លាប់កាន់តែច្រើនដោយសារវាប៉ះពាល់ដល់សមត្ថភាពអ៊ុយក្រែន ក្នុងការការពារខ្លួនប្រឆាំងនឹងការវាយប្រហារមីស៊ីលរបស់រុស្ស៊ី ហើយបានកើតឡើងបន្ទាប់ពីការផ្អាកជំនួយយោធារបស់អាមេរិក នៅសប្តាហ៍នេះ ដល់ទីក្រុងគីវ។ ជំហាននេះក៏គូសបញ្ជាក់ពីឆន្ទៈរបស់លោក Trump ក្នុងការប្រកាន់ជំហរតឹងជាមួយសម្ព័ន្ធមិត្ត ខណៈលោកបង្ហាញវិធីសាស្រ្តផ្សះផ្សាបន្ថែមទៀតចំពោះទីក្រុងមូស្គូ ដោយងាកចេញពីការគាំទ្រដ៏រឹងមាំកាលពីមុនរបស់អាមេរិក សម្រាប់អ៊ុយក្រែន។

សម្ពាធហាក់ដូចជាបានផល ដោយលោក Trump កាលពីថ្ងៃអង្គារបាននិយាយថា លោកបានទទួលលិខិតពីលោក Zelenskiy ដែលក្នុងនោះ មេដឹកនាំអ៊ុយក្រែនរូបនេះបានលើកឡើងថា លោកសុខចិត្តទៅកាន់តុចរចា។

ប្រភពមួយដែលដឹងពីស្ថានភាពនេះនិយាយថា រដ្ឋបាលលោក Trump បានបញ្ឈប់ "គ្រប់យ៉ាង" រួមទាំងទិន្នន័យកំណត់គោលដៅ ដែលអ៊ុយក្រែន បានប្រើប្រាស់ដើម្បីវាយប្រហារគោលដៅរបស់រុស្ស៊ី។ ប្រភពផ្សេងទៀតនិយាយថា ការចែករំលែកចារកម្មត្រូវបានផ្អាក "មួយផ្នែកប៉ុណ្ណោះ" ប៉ុន្តែមិនអាចផ្តល់ព័ត៌មានលម្អិតបន្ថែមទៀតបានទេ៕