សេតវិមានបាននិយាយកាលពីថ្ងៃពុធ (០៥ មីនា) ថា ប្រធានាធិបតីអាមេរិក លោក Donald Trump នឹងលើកលែងក្រុមហ៊ុនផលិតរថយន្តមួយចំនួនពីការផាកពិន័យពន្ធបន្ថែម ២៥% លើកាណាដា និងម៉ិកស៊ិក សម្រាប់ពេលមួយខែ ដរាបណាពួកគេគោរពតាមច្បាប់ពាណិជ្ជកម្មសេរីដែលមានស្រាប់ នៅក្នុងជំហានមួយដែលបញ្ឈប់ភាពរង្គោះរង្គើមួយរយៈរបស់ផ្សារហ៊ុន Wall Street ក្នុងពេលជិត ៣ខែ។

សេតវិមានបន្តថា លោក Trump ក៏បើកចំហផងដែរក្នុងការទទួលស្តាប់ពីផលិតផលផ្សេងទៀតដែលគួរតែត្រូវបានលើកលែងពីពន្ធ ដែលបានចូលជាធរមានកាលពីថ្ងៃអង្គារសប្ដាហ៍នេះ។ ប៉ុន្តែលោក Trump បានបញ្ជាក់យ៉ាងច្បាស់ថា លោកមិនលុបចោលសង្រ្គាមពាណិជ្ជកម្មជាមួយកាណាដា និងម៉ិកស៊ិកទេ ខណៈលោកដាក់សម្ពាធលើប្រទេសទាំងពីរឱ្យរារាំងការរត់ពន្ធសារធាតុហ្វង់តានីល។

ប្រភពឧស្សាហកម្មប្រាប់ថា ក្រុមហ៊ុនផលិតរថយន្តបានគាំទ្រសម្រាប់ការជំរុញការវិនិយោគរបស់អាមេរិក ប៉ុន្តែចង់បានភាពប្រាកដប្រជាលើគោលនយោបាយពន្ធគយ។

ការលើកលែងមួយខែនេះគឺសម្រាប់រថយន្តលក្ខណៈគ្រួសារ និងរថយន្តដឹកទំនិញ ដែលអនុលោមតាមច្បាប់ខ្លឹមសារដ៏ស្មុគស្មាញរបស់កិច្ចព្រមព្រៀងអាមេរិក-ម៉ិកស៊ិក-កាណាដា ឬហៅថា USMCA ដូចដែលលោក Trump បានគូសបញ្ជាក់ ហើយនឹងក្លាយជាអត្ថប្រយោជន៍ដល់ក្រុមហ៊ុន Ford, GM និង Stellantis ជាដើម។ ប្រភពនិយាយថា លោក Trump ក៏អាចនឹងលុបចោលពន្ធ ១០% លើការនាំចូលថាមពលរបស់កាណាដាផងដែរ ដូចជាប្រេងឆៅ និងសាំង ដែលអនុលោមតាមច្បាប់ប្រភពដើម USMCA ដូចគ្នានេះ៕