អូឡាំពិក៖ ប្រតិភូកីឡាកម្ពុជាដែលដឹកនាំដោយឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) និងឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ អមដំណើរដោយឯកឧត្ដម អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាតំណាងក្រសួងអប់រំ យុវជន និងកីឡាបានត្រឡប់មកដល់មាតុភូមិវិញហើយកាលពីល្ងាចថ្ងៃទី២៣ ខែវិច្ឆិកា ក្រោយបញ្ចប់បេសកកម្មនៅទីក្រុងឌូបៃ ប្រទេសអារ៉ាប់រួម ដោយជោគជ័យ បន្ទាប់ពីចុះហត្ថលេខានាំព្រឹត្តិការណ៍ប្រវត្តិសាស្ត្រមកទីក្រុងភ្នំពេញ គឺការទទួលបានសិទ្ធធ្វើម្ចាស់ផ្ទះរៀបចំការប្រកួតកីឡាអូឡាំពិកយុវជនអាស៊ីលើកទី៥ ឆ្នាំ២០២៩។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានបញ្ជាក់ថា បេសកកម្មនេះបានបញ្ចប់ដោយជោគជ័យ និងទទួលបានការអបអរសាទរពេញទំហឹង ពីបណ្ដាប្រទេសសមាជិកក្រុមប្រឹក្សាកីឡាអូឡាំពិកអាស៊ីទាំង ៤៥ប្រទេស ដែលកម្ពុជាទទួលបានសិទ្ធធ្វើម្ចាស់ផ្ទះព្រឹត្តិការណ៍កីឡាដ៏ធំប្រចាំទ្វីបអាស៊ីនេះ។ ឯកឧត្តបានគូសបញ្ជាក់ថា មោទនភាពនេះកើតចេញមកពីការដឹកនាំប្រកបដោយគតិបណ្ឌិតរបស់សម្ដេចនាយករដ្ឋមន្ដ្រី ដែលអនុញ្ញាតឲ្យប្រតិភូកម្ពុជាចូលរួមមហាសន្និបាតទ និងចុះហត្ថលេខាទទួលសិទ្ធធ្វើម្ចាស់ផ្ទះការប្រកួតកីឡាយុវជនដ៏ធំ ៤ឆ្នាំម្ដងនេះ។
គួរដឹងថា ប្រតិភូកីឡាកម្ពុជាបានចាកចេញពីមាតុភូមិកាលពីថ្ងៃទី២០ ខែវិច្ឆិកា មុនមហាសន្និបាតលើកទី៤០ របស់ក្រុមប្រឹក្សាកីឡាអូឡាំពិកអាស៊ី ១ថ្ងៃដែលធ្វើឡើងនៅសណ្ឋាគារ Hilton នាទីក្រុងឌូបៃ ហើយទន្ទឹមជាមួយគ្នានោះក៏មានការចុះហត្ថលេខា រវាងថ្នាក់ដឹកនាំប្រតិភូកីឡាកម្ពុជាជាមួយប្រធានស្ដីទីក្រុមប្រឹក្សាអូឡាំពិកអាស៊ី ដោយឯកឧត្តមរដ្ឋមន្ដ្រី ថោង ខុន ក្នុងនាម NOCC បានចុះហត្ថលេខាក្នុងនាមអ្នករៀបចំព្រឹត្តិការណ៍ ខណៈឯកឧត្តម ឃួង ស្រេង បានចុះហត្ថលេខាក្នុងនាមម្ចាស់ផ្ទះដែលនឹងរៀបចំនៅរាជធានីភ្នំពេញ។ ចំពោះកាលបរិច្ឆេទផ្លូវការនៃព្រឹត្តិការណ៍នេះ នៅមិនទាន់មានការកំណត់នោះទេ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
