ទីភ្នាក់ងារមនុស្សធម៌របស់អង្គការសហប្រជាជាតិ OCHA បាននិយាយថា តម្លៃស្បៀងអាហារនៅដែនដីហ្កាហ្សា បានឡើងថ្លៃខ្ពស់កប់ពពក ហើយជំនួយស្បៀងអាហារអាចនឹងអស់ក្នុងពេលឆាប់ៗនេះ បន្ទាប់ពីអ៊ីស្រាអែល បានរារាំងការចូលនៃជំនួយមនុស្សធម៌។

ដៃគូរបស់ទីភ្នាក់ងារ OCHA បានរាយការណ៍ថា តម្លៃម្សៅមី និងបន្លែបានកើនឡើងច្រើនជាងទ្វេដងនៅក្នុងករណីខ្លះ ហើយពលរដ្ឋហ្កាហ្សា ក៏បានប្រាប់ដូចគ្នានេះ។ OCHA និយាយថា ប្រសិនបើការរារាំងជំនួយនៅតែបន្ត "ផ្ទះបាយសហគមន៍យ៉ាងតិច ៨០កន្លែង អាចនឹងអស់ក្នុងពេលឆាប់ៗនេះ" ហើយចំណែកអាហារនៅសេសសល់ ដែល "នឹងអាចទ្រទ្រង់មនុស្សបាន ៥០០.០០០នាក់ ក៏នឹងអស់ក្នុងពេលឆាប់ៗនេះដែរ"។

អ្នកស្រុកនិយាយថា តម្លៃបានកើនឡើងទ្វេដង ឬបីដងរួចហើយចាប់តាំងពីសង្គ្រាមបានចាប់ផ្តើម ហើយឥឡូវនេះ ប៉េងប៉ោះ ១គីឡូក្រាមដែលធ្លាប់តែតម្លៃ ៥ស្ហាកែល (១,៣៨ដុល្លារ) បានឡើងទ្វេដងដល់ ១០ស្ហាកែល ហើយត្រសក់ ១គីឡូក្រាម ធ្លាប់តែ ៦ស្ហាកែល ពេលនេះឡើងដល់ ១៧ស្ហាកែល រួមទាំងទំនិញជាច្រើនមុខទៀត។

នាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ឈប់ជំនួយនៅកាលពីចុងសប្តាហ៍ ដោយចោទក្រុមហាម៉ាស ថាលួចការផ្គត់ផ្គង់ និងការបដិសេធសំណើរបស់អាមេរិក ដើម្បីបន្តបទឈប់បាញ់ហ្កាហ្សា ប៉ុន្តែអ្នកនាំពាក្យក្រុមហាម៉ាស និយាយថាការផ្អាកនេះគឺជា "ការគំរាមកំហែងយ៉ាងថោកទាបបំផុត"៕