មនុស្សរាប់ពាន់នាក់ បានមកប្រមូលផ្តុំគ្នានៅជុំវិញសភាប្រទេសក្រិក កាលពីថ្ងៃពុធ ទី៥ ខែមីនា ខណៈសមាជិកសភាបានពិភាក្សាអំពីញត្តិរិះគន់ប្រឆាំងរដ្ឋាភិបាលជុំវិញឧទ្ទវហេតុរថភ្លើងបណ្តាលឲ្យមានមនុស្សស្លាប់ច្រើន ។

ក្រុមបាតុករ រួមមាននិស្សិត ក្រុមគ្រួសារជនរងគ្រោះ និងបុគ្គលិក កម្មករ ដោយបានរក្សាភាពស្ងៀមស្ងាត់មួយសន្ទុះ មុនពេលបង្ហោះគោមឡើងទៅលើអាកាសដើម្បីឧទ្ទិសដល់ជនរងគ្រោះក្នុងឧបទ្ទវហេតុរថភ្លើង។ នៅលើចិញ្ចើមផ្លូវ មានទៀនតម្រៀបជារាងលេខ «៥៧» ជាចំនួនអ្នកស្លាប់ក្នុងឧបទ្ទវហេតុរថភ្លើង។

គណបក្ស PASOK ឆ្វេងនិយមកណ្តាល ជាគណបក្សប្រឆាំងធំ និងគណបក្សឆ្វេងនិយមផ្សេងទៀត បានដាក់ញត្តិរិះគន់ប្រឆាំងរដ្ឋាភិបាលរបស់នាយករដ្ឋមន្ត្រី លោក Kyriakos Mitsotakis អំឡុងពេលការជជែកដេញដោលនៅសភា ស្តីពីឧបទ្ទវហេតុនោះ។

ពួកគេបាននិយាយថា រដ្ឋាភិបាលបានបាត់បង់ប្រជាប្រីយភាពសម្រាប់អាណត្តិរបស់ខ្លួន ចាប់តាំងពីការតវ៉ាទ្រង់ទ្រាយធំបំផុតមួយចំនួននៅក្នុងប្រទេសក្រិក រយៈពេលជាច្រើនឆ្នាំមកនេះ ដោយចោទប្រកាន់រដ្ឋាភិបាលពីការគេចវ៉េសពីការទទួលខុសត្រូវលើឧបទ្ទវហេតុរថភ្លើង និងមិនបានធ្វើឲ្យប្រសើរគម្លាតសុវត្ថិភាពសំខាន់ៗ និងបានបិទបាំងភស្តុតាង។

មនុស្សរាប់សែននាក់បានចេញធ្វើបាតុកម្មកាលពីសប្តាហ៍មុន ដើម្បីប្រារព្ធខួបលើកទី២ នៃគ្រោះថ្នាក់រថភ្លើងដ៏អាក្រក់បំផុតរបស់ប្រទេសក្រិក ដោយទាមទាររកយុត្តិធម៌សម្រាប់ជនរងគ្រោះ។ មនុស្ស៥៧នាក់ ភាគច្រើនជានិស្សិត បានស្លាប់ក្នុងគ្រោះថ្នាក់នោះ។