​ចិន៖ កាលពី​ថ្ងៃ​អង្គារ ​ប្រទេស​ចិនបាន​តវ៉ា​ចំពោះ​ការ​បើក​នាវា​ពិឃាត​របស់​កងទ័ពជើងទឹក​អាមេរិក ​ឆ្លងកាត់​ច្រក​សមុទ្រ​តៃវ៉ាន់​ដោយ​ហៅ​សកម្មភាព​នោះ​ថា ​ជា​វិធានការ​ចេតនា​ដើម្បី​បំផ្លាញ​ស្ថិរភាព​ក្នុង​តំបន់​។​ ​កងទ័ពជើងទឹក​សហ​រដ្ឋ​អាមេរិក​បាន​និយាយ​នៅ​ក្នុង​សេចក្តីថ្លែងការណ៍​មួយ​ថា នាវា​ពិឃាត Milius បំពាក់​មី​ស៊ី​ល​ខ្នាត​នាំ​ផ្លូវ Arleigh Burke បាន​ឆ្លងកាត់​ច្រក​សមុទ្រ​តៃវ៉ាន់​តាម​ទម្លាប់កាលពី​ថ្ងៃ​អង្គារ ស្របតាម​ច្បាប់​អន្តរជាតិ​។​

​ប្រភព​ខាងលើ​បាន​និយាយ​ថា​ ការ​ឆ្លង​កាត់​របស់​នាវា​កាត់​តាម​ច្រក​សមុទ្រ​នេះ "​បង្ហាញ​ពី​ការ​ប្តេជ្ញា​ចិត្ត​របស់​សហ​រដ្ឋ​អាមេរិក​ចំពោះ​តំបន់​ឥណ្ឌូ​ប៉ាស៊ីហ្វិក​សេរី​ និង​បើកចំហ។​ ​សេចក្តី​ថ្លែងការណ៍​ដែល​បាន​បង្ហោះ​នៅ​លើ​គេហទំព័រ​របស់​កង​នាវា​ទី៧ បាន​និយាយ​ថា "​យោធា​សហរដ្ឋអាមេរិក​បាន​ហោះហើរ បើកបរ​នាវា និង​ប្រតិបត្តិការ​គ្រប់​ទីកន្លែង​ដែល​ច្បាប់​អន្តរជាតិ​អនុញ្ញាត​"។​ ​ចំណែក​អ្នកនាំពាក្យ​ក្រសួងការបរទេស​ចិនលោក Zhao Lijian បាន​និយាយ​ថា នាវាចម្បាំង​របស់​សហ​រដ្ឋ​អាមេរិក​បាន​នឹង​កំពុង "​បង្ហាញ​សាច់ដុំ និង​បង្កបញ្ហា​នៅ​ច្រក​សមុទ្រ​តៃវ៉ាន់ម្តង​ហើយ​ម្តងទៀត ក្រោមលេសសេរីភាព​នៃ​ការធ្វើ​នាវាចរណ៍​។​ ​លោក Zhao បាន​ប្រាប់​អ្នកយកព័ត៌មាន​នៅក្នុង​សន្និសីទ​សារព័ត៌មាន​ប្រចាំថ្ងៃ​ថា "​នេះ​មិនមែនជា​ការប្តេជ្ញាចិត្ត​ចំពោះ​សេរីភាព និង​ការបើកចំហរ​នោះទេ ប៉ុន្តែ​ជាការ​ប៉ុនប៉ង​ដោយ​ចេតនា​ដើម្បី​រំខាន និង​ធ្វើ​ឲ្យ​ប៉ះពាល់​ដល់​សន្តិភាព និង​ស្ថិរភាព​ក្នុង​តំបន់​។​

​ស្របពេល​ដែល​ភាព​តានតឹង​រវាង​អាមេរិក និង​ចិនជុំវិញ​បញ្ហា​កោះ​តៃវ៉ាន់​នៅតែ​ពុំទាន់​ដោះស្រាយបាន កាលពី​ថ្ងៃ​អង្គារកោះ​តៃវ៉ាន់ និង​សហរដ្ឋអាមេរិកបាន​ពិភាក្សាគ្នា​តាម​វីដេអូរយៈពេល​ ៥​ម៉ោង​ស្ដីពី​ការចរចា​សេដ្ឋកិច្ច​ប្រចាំឆ្នាំ​លើក​ទី​២ ​របស់ខ្លួន។ ​ជំនួប​នេះក៏​ពិភាក្សា​ផងដែរ​ពី​ទណ្ឌកម្ម​របស់​ក្រុង​ប៉េកាំង​លើ​ប្រទេសលី​ទុយ​អា​នី បន្ទាប់ពី​ប្រទេស​ជា​សមាជិក​សហភាព​អឺរ៉ុប​មួយ​នេះ បានអនុញ្ញាត​ឲ្យ​កោះ​តៃវ៉ាន់​បើក​ការិយាល័យ​តំណាង​ក្រោម​ឈ្មោះ​កោះ​តៃវ៉ាន់នៅក្នុង​រដ្ឋធានី​របស់​ខ្លួន៕

អត្ថបទ៖ សុខមាន