​បាល់ទាត់៖ ​ក្តី​សង្ឃឹម​របស់ Barcelona ឡើង​ទៅ​កាន់​វគ្គ ១៦​ក្រុម​ចុងក្រោយ UEFA Champions League ត្រូវ​រង់ចាំ​នៅ​ប្រកួត​ចុងក្រោយ​ក្នុង​ពូ​ល E នេះ​បន្ទាប់ពី​បាន​ត្រឹម​ស្មើ ០-០ ពេល​ទទួល​ភ្ញៀវ Benfica យប់​មិញ​។ ​​នេះ​ជា​ប្រកួត​ដំបូង​របស់ Barcelona នៅ UCL ក្រោម​ការដឹកនាំ​របស់ Xavi ហើយក៏​ជា​ប្រកួត​ដែល​គ្មាន​សំណាង​ដែរ​ បន្ទាប់ពី​ឱកាស​ជាច្រើន​តែ​ធ្វើ​មិនបាន​សំរេច​។

​​ឱកាស​របស់​កីឡាករ​វ័យ ១៧ឆ្នាំ Yusuf Demir ដែល​ខ្ចី​ពី Rapid Vienna ស៊ុត​បុករ​បាទី​ខណៈ Ronald Araujo ស៊ុត​បញ្ចូល​ទី​បានសំរេច​តែ​អាជ្ញាកណ្តាល​មិនឱ្យ​។ ​​ចប់​ការប្រកួត​ក្រុម​ទាំងពីរ​ធ្វើ​អ្វី​គ្នា​មិនបាន ​ខណៈ Barcelona បាន​មួយ​ពិន្ទុ​ទៀត​នៅ​បន្ត​ឈរ​លេខ ២ ក្នុង​ពូ​ល​មាន ៧ពិន្ទុ​ឯ Benfica ឈរ​លេខ ៣ មាន ៥ពិន្ទុ​។ ​​ប្រកួត​ចុងក្រោយ​ក្នុង​ពូ​ល E នេះ Barcelona ត្រូវ​ទៅ​ទឹកដី Bayern Munich ខណៈ Benfica ទទួល Dynamo Kyiv​។ ​​ចំណែក​ឯក Bayern Munich ដែលមាន​កីឡាករ​តែ ១៣នាក់​ទៅ​ទឹកដី Dynamo Kyiv យប់មិញ​នៅតែ​អាច​រកបាន​បី​ពិន្ទុ​ត្រលប់​មកវិញ​តាមរយៈ​ជ័យជំនះ ២-១​។

​​Bayern Munich មិនមាន​វត្តមាន​កីឡាករ​មួយចំនួនធំ​ដូចជា Joshua Kimmich, Serge Gnabry, Jamal Musiala, Choupo-Moting និង Michael Cuisance ដែល​សុទ្ធតែ​ពាក់ព័ន្ធ​ជាមួយ​អ្នក​ឆ្លង Covid-19​។ ​​យ៉ាងណាក្តី Robert Lewandowski នៅតែ​អាច​រក​គ្រាប់​បាល់​បាន ជាមួយនឹង Kingsley Coman ឱ្យ Bayern Munich យកឈ្នះ​ប្រកួត​ទី៥ របស់​ខ្លន​រក្សា​ស្ថិតិ​ឈ្នះ ១០០% ក្នុង​ពូ​ល​មាន ១៥ពិន្ទុ​ពេញ​ ខណៈ Dynamo Kyiv ឆ្លងកាត់​បរាជ័យ​នេះ​ពួកគេ​អស់​ឱកាស​ហើយ​ទាំង​លេខ ២ ទៅ​វគ្គ​បន្ត ​និង​លេខ ៣ ទៅ Europa League៕

​អត្ថបទ​៖​នាង សុភា​វុ​ធ