ប្រធានាធិបតីរបស់ប្រទេសម៉ិកស៊ិក បាននិយាយកាលពីថ្ងៃពុធ ទី៥ ខែមីនា ថា រដ្ឋាភិបាលរបស់ប្រទេសម៉ិកស៊ិក អាចនឹងស្វែងរកដៃគូពាណិជ្ជកម្មផ្សេងទៀត បន្ទាប់ពីសហរដ្ឋអាមេរិក បានដំឡើងពន្ធលើប្រទេសជិតខាងនៅភាគខាងត្បូងរបស់ខ្លួន។

ប្រធានាធិបតី លោកស្រី ក្លៅឌៀ សេនបោម(Claudia Sheinbaum) បាននិយាយថាម៉ិកស៊ិក អាចផ្លាស់ប្តូរសម្ព័ន្ធមិត្តពាណិជ្ជកម្ម «ប្រសិនបើចាំបាច់» ដោយនិយាយសំដៅទៅលើការនៅតែបន្តដំឡើងពន្ធ ដែលអាចកើតមាន។

ការដំឡើងពន្ធថ្មី ២៥% របស់ប្រធានាធិបតីអាមេរិក លោក Donald Trump លើការនាំចូលពីប្រទេសម៉ិកស៊ិក និងកាណាដា បានចូលជាធរមានកាលពីថ្ងៃអង្គារ ទី៤ ខែមីនា រួមជាមួយនឹងពន្ធថ្មីលើទំនិញរបស់ប្រទេសចិន ដោយឈរក្នុងការផ្លាស់ប្តូរខ្លាំងនូវខ្សែច្រវ៉ាក់ផ្គត់ផ្គង់ និងភាពជាដៃគូពាណិជ្ជកម្មយូរអង្វែង។

លោកស្រី Sheinbaum បាននិយាយនៅក្នុងសន្និសីទសារព័ត៌មានប្រចាំថ្ងៃពេលព្រឹកថា លោកស្រី បានកំណត់ពេលការជួបសន្ទនាតាមទូរស័ព្ទផ្ទាល់ នៅថ្ងៃព្រហស្បតិ៍នេះ ជាមួយមេដឹកនាំសហរដ្ឋអាមេរិកអំពីការដំឡើងពន្ធ។

លោកស្រី Sheinbaum និយាយថា «វាគឺជាពេលវេលាដ៏ច្បាស់លាស់សម្រាប់ប្រទេសម៉ិកស៊ិក» ។ «សេដ្ឋកិច្ចរបស់យើងមានភាពល្អប្រសើរ ប៉ុន្តែនឹងពុំមានការព្រមទទួលយកឡើយ»។

នៅក្នុងការអំពាវនាវចំពោះមោទនភាពជាតិម៉ិកស៊ិក លោកស្រី Sheinbaum បានអំពាវនាវឱ្យមានការធ្វើបាតុកម្ម នៅថ្ងៃអាទិត្យខាងមុខ នៅទីលាន Zocalo ជាប្រវត្តិសាស្ត្ររបស់ម៉ិកស៊ិក ជាកន្លែងដែលលោកស្រី នឹងបញ្ជាក់ពីការឆ្លើយតបរបស់លោកស្រី ចំពោះសហរដ្ឋអាមេរិក ដែលលោកស្រី និយាយថា នឹងរួមមានទាំងការដំឡើងពន្ធសងសឹក។