កងកម្លាំងប្រដាប់អាវុធហ្ស៊កដានី បាននិយាយនៅក្នុងសេចក្តីថ្លែងការណ៍មួយថា កងកម្លាំងព្រំដែនហ្ស៊កដានី កាលពីថ្ងៃព្រហស្បតិ៍នោះ បានប៉ះទង្គិចគ្នា ជាមួយនឹងក្រុមរត់ពន្ធប្រដាប់អាវុធ ដែលប៉ុនប៉ងឆ្លងកាត់ព្រំដែនភាគខាងជើងពីប្រទេសស៊ីរី ចូលទៅក្នុងហ្ស៊កដានី។

ការប៉ះទង្គិចគ្នានេះ បានបណ្តាលឲ្យអ្នករត់ពន្ធ ៤នាក់ ស្លាប់ ខណៈបុគ្គលដែលនៅសេសសល់ បានដកថយចូលទៅក្នុងទឹកដីស៊ីរី។

យោងតាមសេចក្តីថ្លែងការណ៍ បានឲ្យដឹងថា អ្នករត់ពន្ធបានព្យាយាមទាញយកលក្ខខណ្ឌអាកាសធាតុមិនល្អ និងអ័ព្ទក្រាស់ ដើម្បីឆ្លងកាត់ព្រំដែន ប៉ុន្តែកងកម្លាំងហ្ស៊កដានី «អនុវត្តច្បាប់ប្រយុទ្ធប្រឆាំង ដើម្បីទប់ស្កាត់ការលួចជ្រៀតចូលរបស់ពួកគេ»។

កម្លាំងប្រដាប់អាវុធ បាននិយាយថា គ្រឿងញៀន និងអាវុធដ៏ច្រើនសន្ធឹកសន្ធាប់ ត្រូវបានរឹបអូសនិងបញ្ជូនទៅអាជ្ញាធរពាក់ព័ន្ធ។

បរិមាណគ្រឿងញៀនដែលរឹបអូសនោះ មិនត្រូវបានគេបង្ហាញឲ្យដឹងឡើយ ។

កាលពីខែមករា ប្រទេសហ្ស៊កដានី និងស៊ីរី បានព្រមព្រៀងគ្នាបង្កើតគណៈកម្មាធិការសន្តិសុខរួមគ្នាមួយ ដើម្បីការពារព្រំដែនរបស់ពួកគេ ប្រយុទ្ធប្រឆាំងអាវុធ និងការរត់ពន្ធគ្រឿងញៀន និងទប់ស្កាត់ក្រុមសកម្មប្រយុទ្ធឥស្លាមDaeshមិនឲ្យងើបឡើងវិញ។