មេដឹកនាំអ៊ីស្រាអែល និងអន្តរជាតិបានចែករំលែកប្រតិកម្មរបស់ពួកគេ ចំពោះប្រធានាធិបតីអាមេរិក លោក ដូណាល់ ត្រាំ ដែលបានចេញឱសានវាទដល់ក្រុមហាម៉ាស តាមរយៈការបង្ហោះនៅលើបណ្ដាញសង្គម Truth Social និង X (អតីត Twitter) កាលពីយប់ថ្ងៃពុធ (ទី៥ ខែមីនា)។

បន្ទាប់ពីមានជំនួបនៅសេតវិមានរបស់លោក Trump ជាមួយចំណាប់ថ្នូរអ៊ីស្រាអែលចំនួន ៦នាក់ ដែលត្រូវបានដោះលែង នៅទីក្រុងវ៉ាស៊ីនតោន ប្រធានាធិបតីអាមេរិកបានបង្ហោះការព្រមានដល់ក្រុមភេរវករនេះ។ លោក Trump បានគំរាមតាមសាររបស់លោកថា៖ «នេះគឺជាការព្រមានចុងក្រោយ ចំពោះអ្នក! សម្រាប់ភាពជាអ្នកដឹកនាំ ឥឡូវនេះ ដល់ពេលហើយដែលត្រូវចាកចេញពីតំបន់ហ្កាហ្សា ខណៈពេលដែលអ្នកនៅមានឱកាស»។

ភ្លាមៗ បន្ទាប់ពីការបង្ហោះនោះត្រូវបានចែករំលែក មេដឹកនាំជាច្រើនបានសម្តែងការគាំទ្ររបស់ខ្លួនចំពោះការត្រៀមខ្លួនរបស់លោក Trump ក្នុងការចាត់វិធានការប្រឆាំងនឹងក្រុមហាម៉ាស។ ជាក់ស្ដែងរដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich បានចែករំលែកសារនោះនៅលើបណ្ដាញសង្គម X ហើយបានសរសេររៀបរាប់ថា៖ «សូមអរគុណលោកប្រធានាធិបតី សម្រាប់ការប្តេជ្ញាចិត្តរបស់អ្នក ចំពោះសន្តិសុខរបស់ប្រទេសអ៊ីស្រាអែល និងសន្តិសុខពិភពលោកទាំងមូល និងសម្រាប់ការព្រួយបារម្ភរបស់អ្នកចំពោះចំណាប់ថ្នូររបស់យើងទាំងអស់»។

ដោយបន្ថែមពីលើការគាំទ្ររបស់លោក អតីតរដ្ឋមន្ត្រីសន្តិសុខជាតិរបស់អ៊ីស្រាអែល លោក Itamar Ben-Gvir បានប្រាប់ថា រដ្ឋាភិបាលត្រូវតែទទួលយកសំណើរបស់ប្រធានាធិបតី Trump។ រីឯប្រធានគណៈកម្មាធិការធម្មនុញ្ញសភា Knesset លោក MK Simcha Rothman បានចែករំលែកសារ អមដោយពាក្យថ្លែងអំណរគុណ។ សមាជិកព្រឹទ្ធសភាមកពីបក្សសាធារណរដ្ឋរបស់អាមេរិក លោក Lindsey Graham បានសរសេរថា៖ «លោកប្រធានាធិបតី Donald Trump អ្នកទទួលបានគាំទ្រទាំងស្រុង និងពេញទំហឹងពីខ្ញុំ»។ អតីតបេសកជនអាមេរិក ប្រចាំតំបន់មជ្ឈិមបូព៌ា លោក Jason Greenblatt បាននិយាយថា៖ «វិធីសាស្រ្តរបស់លោកប្រធានាធិបតី Trump ប្រហែលជាខុសពីមនុស្សមួយចំនួន ប៉ុន្តែទទួលបានលទ្ធផលជាក់ស្តែង»។ ហើយអតីតឯកអគ្គរដ្ឋទូត ប្រចាំនៅអ៊ីស្រាអែល អំឡុងអាណត្តិដំបូងរបស់លោក Trump គឺលោក David Friedman បានបន្ថែមថា៖ «ខ្ញុំស្រលាញ់បុរសម្នាក់នេះ។ នេះជាសារដ៏ត្រឹមត្រូវចេញពីមនុស្សដ៏ត្រឹមត្រូវ ក្នុងពេលវេលាដ៏ត្រឹមត្រូវ!»។

តាមរយៈការបង្ហោះ នៅលើបណ្ដាញសង្គម X គណៈកម្មាធិការសកម្មភាពនយោបាយគាំទ្រអ៊ីស្រាអែល AIPAC បានថ្លែងអំណរគុណដល់លោក Trump សម្រាប់ «ការទាមទារយ៉ាងច្បាស់លាស់របស់លោក ដែលថា ក្រុមហាម៉ាសត្រូវដោះលែងចំណាប់ថ្នូរទាំងអស់ឥឡូវនេះ និងសម្រាប់ការធានា ដែលថា អ៊ីស្រាអែលមានធនធានត្រូវការការពារគ្រួសាររបស់ខ្លួន»៕