ចាប់តាំងពីវិលត្រឡប់ទៅកាន់សេតវិមានវិញ លោកប្រធានាធិបតី Donald Trump បានផ្លាស់ប្តូរជំហររបស់សហរដ្ឋអាមេរិកយ៉ាងខ្លាំង ជុំវិញបញ្ហាសន្តិសុខពិភពលោក ជាពិសេសទាក់ទងនឹងសង្គ្រាមរបស់រុស្ស៊ី នៅប្រទេសអ៊ុយក្រែន។ ជម្លោះពាក្យសម្ដី នាពេលថ្មីៗនេះ រវាងលោក និងប្រធានាធិបតីអ៊ុយក្រែន លោក Volodymyr Zelenskyy និងការផ្អាកផ្ដល់ជំនួយយោធារបស់សហរដ្ឋអាមេរិកដល់ទីក្រុងគីវ បានធ្វើឲ្យសម្ព័ន្ធមិត្តអឺរ៉ុប មានការព្រួយបារម្ភ ដែលភ័យខ្លាចថា ទីក្រុងវ៉ាស៊ីនតោន ប្ដូរទិសដៅចេញពីទ្វីបនេះ។

សម្ព័ន្ធមិត្ត នៅតំបន់អាស៊ី ដូចជា ជប៉ុន កូរ៉េខាងត្បូង និងហ្វីលីពីន កំពុងតាមមើលយ៉ាងដិតដល់នូវការវិវត្តទាំងនេះ ដោយបារម្ភពីការប្តេជ្ញាចិត្តរបស់លោក Trump ចំពោះសន្តិសុខរបស់ពួកគេ។ ប្រទេសជប៉ុន និងកូរ៉េខាងត្បូង ពឹងផ្អែកយ៉ាងខ្លាំងលើទីក្រុងវ៉ាស៊ីនតោន សម្រាប់ការការពារជាតិ។ តែក្តីបារម្ភកំពុងកើនឡើង ដែលថា លោក Trump អាចទាមទារការបង់ប្រាក់ខ្ពស់ សម្រាប់ការដាក់ពង្រាយកងទ័ព ឬបង្វែរការយកចិត្តទុកដាក់ចេញពីតម្រូវការសន្តិសុខរបស់ពួកគេ។ អ្នកខ្លះមើលឃើញការផ្លាស់ប្តូររបស់ក្រុងវ៉ាស៊ីនតោនថា ជាការផ្តោតខ្លាំងលើការប្រឆាំងនឹងប្រទេសចិន។ 

មន្ត្រីសហរដ្ឋអាមេរិក ក្នុងនោះរួមទាំងរដ្ឋមន្ត្រីការពារជាតិ លោក Pete Hegseth បានសង្កត់ធ្ងន់លើការផ្តល់អាទិភាពដល់តំបន់ឥណ្ឌូ-ប៉ាស៊ីហ្វិក ជាងតំបន់អឺរ៉ុប។ ចំណែកអ្នកដែលត្រូវបានតែងតាំងដោយលោក Trump សម្រាប់តំណែងអនុរដ្ឋមន្ត្រីការពារជាតិ គឺលោក Elbridge Colby ថ្មីៗនេះ បានសង្កត់ធ្ងន់ពីសារៈសំខាន់របស់កោះតៃវ៉ាន់ ទោះបីជាលោកបានរិះគន់ដល់ការចំណាយលើវិស័យការពារដែនដីរបស់កោះនេះក៏ដោយ។ 

រីឯប្រទេសអាស៊ីអាគ្នេយ៍ជាច្រើន មានការភ័យខ្លាច ចំពោះឆន្ទៈរបស់លោក Trump ក្នុងការចរចាជាមួយរុស្ស៊ី ដែលបង្ហាញពីការផ្លាស់ប្តូរកាន់តែទូលំទូលាយឆ្ពោះទៅរកការផ្តល់អាទិភាពដល់អំណាចនយោបាយជាងសម្ព័ន្ធភាព ខណៈអ្នកវិភាគខ្លះបារម្ភថា លោក Trump ទីបំផុតអាចស្វែងរកការចរចាដ៏ធំជាមួយចិន ដោយធ្វើឲ្យប្រទេសតូចៗក្នុងតំបន់ងាយរងគ្រោះ។ 

ប្រទេស ដូចជាហ្វីលីពីន កំពុងប្រកាន់យកនូវវិធីសាស្រ្តជាក់ស្តែង ដោយបន្តរក្សាទំនាក់ទំនងជាមួយសហរដ្ឋអាមេរិក ខណៈដែលពង្រឹងសមត្ថភាពការពារជាតិរបស់ពួកគេ និងលើកកម្ពស់ភាពជាដៃគូជាមួយជប៉ុន អូស្ត្រាលី និងកូរ៉េខាងត្បូង។ តែយ៉ាងណាក្ដី កម្លាំងនយោបាយផ្ទៃក្នុង ដែលអនុគ្រោះដល់ទំនាក់ទំនងកាន់តែជិតស្និទ្ធជាមួយចិន ធ្វើឲ្យមានភាពស្មុគស្មាញដល់កិច្ចប្រឹងប្រែងនេះ។ 

សរុបមក ការផ្លាស់ប្តូរគោលនយោបាយការបរទេសរបស់លោក Trump បានធ្វើឲ្យសម្ព័ន្ធមិត្តអាស៊ី មានភាពមិនច្បាស់លាស់ ដោយជំរុញឲ្យពួកគេវាយតម្លៃឡើងវិញនូវយុទ្ធសាស្ត្រសន្តិសុខរបស់ខ្លួន។ ទោះបីជាពួកគេមិនអាចជំនួសសហរដ្ឋអាមេរិក ក្នុងនាមជាអ្នកផ្តល់សន្តិសុខក៏ដោយ ក៏ពួកគេកំពុងរៀបចំត្រៀម សម្រាប់អនាគតមួយ ដែលការប្តេជ្ញាចិត្តរបស់អាមេរិក អាចនឹងមិនត្រូវបានធានាទៀតឡើយ៕