ក្រុមប្រឹក្សាអឺរ៉ុប កាលពីថ្ងៃពុធ (ទី៥ ខែមីនា) បានប្រាប់ឲ្យដឹងថា ខ្លួនបានកត់ត្រា ២៦៦ករណីនៃការវាយប្រហារលើរាងកាយ ការបំភិតបំភ័យ ការចាប់ខ្លួន និងការសងសឹកប្រឆាំងនឹងអ្នកសារព័ត៌មានអន្តរជាតិ នៅទូទាំងទ្វីបអឺរ៉ុប ក្នុងឆ្នាំ២០២៤។

របាយការណ៍ស្តីពីសេរីភាពសារព័ត៌មានអឺរ៉ុប ប្រចាំឆ្នាំ២០២៤ របស់ក្រុមប្រឹក្សានេះ បានចងក្រងទិន្នន័យពីសម្ព័ន្ធនៃអង្គការមិនមែនរដ្ឋាភិបាល និងសមាគមអ្នកសារព័ត៌មានចំនួន ១៥ស្ថាប័ន។

របាយការណ៍នេះ បង្ហាញពីអំពើហិង្សាដែលកំពុងកើនឡើងប្រឆាំងនឹងសារព័ត៌មាន ជាពិសេសនៅក្នុងប្រទេសអ៊ុយក្រែន និងហ្សកហ្ស៊ី។ ប្រហែល ៦៤ភាគរយនៃការវាយប្រហារដែលត្រូវបានកត់ត្រា បានកើតឡើងនៅប្រទេសរុស្ស៊ី និងដែនដីដែលរុស្ស៊ីកាន់កាប់ នៅអ៊ុយក្រែន។ ក្រុមប្រឹក្សាអឺរ៉ុប បានព្រមានពីការបន្តមានហានិភ័យ ចំពោះអ្នកសារព័ត៌មានដែលរាយការណ៍ពីការលុកលុយរបស់រុស្ស៊ី។

ក្រុមប្រឹក្សាអឺរ៉ុប បានលើកឡើងពីក្ដីបារម្ភ ជុំវិញការបង្កើនការគ្រប់គ្រងរបស់រដ្ឋាភិបាលលើប្រព័ន្ធផ្សព្វផ្សាយ ដោយគូសបញ្ជាក់ពីរបៀបដែលតួអង្គនយោបាយ កំពុងមានឥទ្ធិពលលើគោលនយោបាយវិចារណកថា និងការកាត់បន្ថយកផ្តល់មូលនិធិ។ អ៊ីតាលី និងស្លូវ៉ាគី ត្រូវបានលើកយកមកធ្វើជាគំរូដ៏សំខាន។

ហើយជាមួយគ្នានេះ ក្រុមប្រឹក្សាក៏បានរាយការណ៍ពីការកើនឡើងនូវព័ត៌មានមិនពិត ក្នុងនោះរួមទាំងមាតិកាដែលបង្កើតដោយបញ្ញាសិប្បនិម្មិត (AI) ដោយលើកឡើងថា ព័ត៌មានមិនពិតកំពុងជះឥទ្ធិពលដល់មតិសាធារណៈ និងធ្វើឲ្យអ្នកសារព័ត៌មានឯករាជ្យចុះខ្សោយ៕