នាយករដ្ឋមន្ត្រី Greenland កាលពីថ្ងៃពុធ (ទី៥ ខែមីនា) បានប្រកាសថា «ដែនដីហ្គ្រីនលែនជារបស់យើង» ហើយមិនអាចមានការដណ្ដើមទៅគ្រប់គ្រង ឬទិញដូរនោះឡើយ ដោយនេះជាការផ្គើនទៅនឹងសារពីប្រធានាធិបតីអាមេរិក លោក Donald Trump ដែលបាននិយាយថា រដ្ឋបាលរបស់លោកគាំទ្រសិទ្ធិស្វ័យសម្រេចរបស់កោះអាកទិកមួយនេះ ប៉ុន្តែបានបន្ថែមថា សហរដ្ឋអាមេរិកនឹងកាន់កាប់ «តាមមធ្យោបាយមួយ ឬផ្សេងទៀត»។

នាយករដ្ឋមន្ត្រី Greenland លោក Mute Bourup Egede បាននិយាយថា ពលរដ្ឋនៃកោះនេះ មិនមែនជាជនជាតិអាមេរិក ឬដាណឺម៉ាកនោះទេ ដ្បិតពួកគេ គឺជាអ្នកកោះ Greenland ដោយកាលពីថ្ងៃពុធ លោកបានសរសេរបង្ហោះនៅលើបណ្ដាញសង្គម Facebook ជាភាសា Greenland និងដាណឺម៉ាកថា សហរដ្ឋអាមេរិកត្រូវតែយល់ពីរឿងនេះ។ ហើយលោក Egede បានបញ្ជាក់ថា អនាគតរបស់ Greenland នឹងត្រូវសម្រេចដោយប្រជាជនរបស់ដែនដីនេះ។

ការបង្ហោះរបស់លោកបានកើតឡើងប៉ុន្មានម៉ោងបន្ទាប់ពីលោក Trump បានធ្វើការអំពាវនាវដោយផ្ទាល់ទៅកាន់អ្នកកោះ Greenland ក្នុងសុន្ទរកថាទៅកាន់សភា កាលពីថ្ងៃអង្គារ (ទី៤ ខែមីនា) ពោលគឺមួយសប្តាហ៍មុនពេលប្រជាជននៃដែនដីនេះទៅបោះឆ្នោត សម្រាប់ការបោះឆ្នោតសភា។

លោក Trump បាននិយាយថា៖ «យើងគាំទ្រយ៉ាងមុតមាំនូវសិទ្ធិរបស់អ្នក ក្នុងការសម្រេចអនាគតផ្ទាល់ខ្លួន ហើយប្រសិនបើអ្នកជ្រើសរើស យើងស្វាគមន៍អ្នកមកកាន់សហរដ្ឋអាមេរិក»។ លោកបានបន្ថែមថា៖ «យើងនឹងថែទាំអ្នកឲ្យមានសុវត្ថិភាព។ យើងនឹងធ្វើឲ្យអ្នកក្លាយជាអ្នកមាន។ ហើយរួមជាមួយគ្នា យើងនឹងធ្វើឲ្យ Greenland រីកចម្រើន ក្នុងកម្រិតដែលអ្នកមិនធ្លាប់បានគិតពីមុនមក»។

ប៉ុន្តែលោក Trump ក៏បានលើកឡើងផងដែរថា រដ្ឋបាលរបស់លោកកំពុង «ធ្វើការជាមួយអ្នកគ្រប់គ្នាដែលពាក់ព័ន្ធ ដើម្បីព្យាយាមបានគ្រប់គ្រងដែនដីនេះ» ដោយនេះជាការសំដៅទៅបំណងប្រាថ្នារបស់លោក ក្នុងការទិញយក Greenland ពីប្រទេសដាណឺម៉ាក ដែលជាសម្ព័ន្ធមិត្តរបស់សហរដ្ឋអាមេរិកជាយូរមកហើយ៕