អង្គការសុខភាពពិភពលោក (WHO) កាលពីថ្ងៃពុធ (ទី៥ ខែមីនា) បានលើកឡើងថា ការសម្រេចរបស់រដ្ឋបាលលោក Donald Trump ក្នុងការផ្អាកជំនួយបរទេសរបស់សហរដ្ឋអាមេរិក នឹងបន្ទច់បង្អាក់ដល់ដំណើរការទប់ស្កាត់ការឆ្លងជំងឺរបេង (TB) នៅទូទាំងប្រទេសដែលមានប្រាក់ចំណូលទាប និងមធ្យម ដោយធ្វើឲ្យជីវិតមនុស្សរាប់លាននាក់ប្រឈមនឹងហានិភ័យ។

នាយកកម្មវិធីសកលរបស់ WHO ស្តីពីជំងឺរបេង និងសួត លោកស្រី Tereza Kasaeva បាននិយាយថា៖ «ដោយគ្មានវិធានការភ្លាមៗនោះ ដំណើរការដែលពិបាកសម្រេចបាន ក្នុងការប្រយុទ្ធប្រឆាំងនឹងជំងឺរបេង កំពុងស្ថិតក្នុងហានិភ័យ។ ការឆ្លើយតបរួមរបស់យើង ត្រូវតែមានភាពប្រែប្រួល យុទ្ធសាស្ត្រ និងធនធានពេញលេញ ដើម្បីការពារអ្នកដែលងាយរងគ្រោះបំផុត និងបន្តរក្សាសន្ទុះឆ្ពោះទៅរកការលុបបំបាត់ជំងឺរបេងទាំងស្រុង»។

បើយោងតាមទីភ្នាក់ងារនេះ បានឲ្យដឹងថា ជំនួយអន្តរជាតិដ៏សំខាន់ៗ ជាពិសេសពីទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ (USAID) បានជួយទប់ស្កាត់អត្រាមរណភាពប្រហែល ៣,៦៥លាននាក់ ក្នុងឆ្នាំ២០២៤ តែមួយគត់ ពីជំងឺដ៏កាចសាហាវនេះ។

WHO បានបញ្ជាក់ថា សហរដ្ឋអាមេរិកបានរួមចំណែកជាប្រវត្តិសាស្ត្រប្រហែល ១ភាគ៤នៃមូលនិធិរបស់ម្ចាស់ជំនួយអន្តរជាតិសរុប សម្រាប់កម្មវិធីទប់ស្កាត់ជំងឺរបេង ដែលមានចំនួនប្រហែលពី ២០០លានដុល្លារ ទៅដល់ ២៥០លានដុល្លារជារៀងរាល់ឆ្នាំ នៅក្នុងការផ្តល់មូលនិធិទ្វេភាគី។

បន្ថែមពីលើនេះ USAID ក៏បានបញ្ឈប់ការផ្ដល់មូលនិធិទាំងអស់របស់ខ្លួន ចំពោះការពិសោធន៍ ដោយបានប៉ះពាល់យ៉ាងធ្ងន់ធ្ងរដល់ដំណើរការសិក្សាស្រាវជ្រាវ ពាក់ព័ន្ធនឹងជំងឺរបេង៕