នៅថ្ងៃព្រហស្បតិ៍នេះ ចិនបានធ្វើមាតុភូមិនិវត្តន៍រលកទី ២នៃជនជាតិរបស់ខ្លួនចេញពីមជ្ឈមណ្ឌលឆបោកមីយ៉ាន់ម៉ា ឆ្លងកាត់តាមប្រទេសថៃ បន្ទាប់ពីវិធានការបោសសម្អាតដែលបានចាប់ផ្តើមកាលពីខែកុម្ភៈ កន្លងទៅ ហើយនិងនាំឲ្យមានការនាំខ្លួនជនបរទេសជាង ៧ពាន់នាក់ ចេញពីទីតាំងឆបោកជាច្រើនកន្លែង ។

យោងតាមការអះអាងរបស់ក្រុមមន្រ្តីថៃ បានឲ្យដឹងថា ជនជាតិចិនត្រូវបាននាំចេញពីប្រទេសមីយ៉ាន់ម៉ាទៅកាន់ប្រទេសថៃតាមរថយន្តក្រុង ដំណើរការតាមរយៈអន្តោប្រវេសន៍ ហើយនិងការឆ្លងកាត់ការផ្ទៀងផ្ទាត់អត្តសញ្ញាណ ដើម្បីបញ្ចូលទៅក្នុងប្រព័ន្ធបញ្ជីខ្មៅរបស់ការិយាល័យអន្តោប្រវេសន៍ មុនពេលត្រូវបានបញ្ជូនទៅកាន់អាកាសយានដ្ឋាននៅទីក្រុង Mae Sot គឺជាទីក្រុងព្រំដែនរវាងប្រទេសថៃ និងមីយ៉ាន់ម៉ា ។

ការបញ្ជូនខ្លួននេះដែរ គឺជាផ្នែកមួយនៃកិច្ចខិតខំធ្វើមាតុភូមិនិវត្តន៍ទ្រង់ទ្រាយធំ ដែលរួមទាំងជើងហោះហើរជួល ១៩វ៉ុល កំណត់ឲ្យហោះហើរចាប់ពីថ្ងៃទី ៦ ដល់ថ្ងៃទី ៩ ខែមីនា ដើម្បីបញ្ជូនជនជាតិចិន ១.៤៣៩នាក់ ទៅកាន់ប្រទេសកំណើតរបស់ពួកគេវិញ ។

ការធ្វើមាតុភូមិនិវត្តន៍នេះ បានកើតមានឡើង ស្របពេលកិច្ចខិតខំបន្តរបស់ចិន ថៃ និងមីយ៉ាន់ម៉ា ដើម្បីរុះរើប្រតិបត្តិការឆបោកឆ្លងដែន ដែលក្រុមអាជ្ញាធរ និយាយថា គឺជាផ្នែកមួយនៃបណ្តាញឧក្រិដ្ឋជនធំទូលាយដែលកំពុងរីកដុះដាលយ៉ាងខ្លាំងនៅក្នុងតំបន់អាស៊ីអាគ្នេយ៍ ជាទីដែលមនុស្សរាប់ពាន់នាក់ ត្រូវបានគេជួញដូរឲ្យធ្វើការទាំងបង្ខំ ៕