​បាល់ទាត់៖ ​ក្រុម​ការពារ​តំណែង​ជើងឯក UEFA Champions League តោ​ខៀវ Chelsea បាន​ឡើង​មក​លើ​គេ​វិញ​ក្នុង​ពូ​ល H ក្រោយ​បំបាក់​ក្រុម​អ៊ីតាលី​សេះបង្កង់ Juventus ៤-០ យប់មិញ​នៅ Stamford Bridge​។​ ​Trevoh Chalobah ដែល​បង្ហាញខ្លួន​លើកដំបូង​នៅ UCL គឺជា​អ្នក​បើក​ការ​នាំ​មុខ​មុន​ឱ្យ Chelsea នៅ​នាទី​ទី២៥ មុន​ពេល​ខ្សែ​ការពារ Reece James បន្ថែម​គ្រាប់​នាំមុខ​នៅ​វគ្គ​ទី២ នាទី​ទី៥៥​។

​Callum Hodson-Odoi ក៏​រក​បាន​មួយ​គ្រាប់​ដែរ​នៅ​នាទី​ទី៥៨ មុនពេល​ដែល Timo Werner រក​បាន​គ្រាប់​បង្ហើយ​នៅ​នាទី​ទី៩០+៥​។ ​ក្រុម​របស់​លោក Thomas Tuchel មានឱកាស​គ្រប់គ្រង​បាល់​ច្រើន​ក្នុង​ការ​ប្រកួត​ និង​ឱកាស​ស៊ុត​ដល់​ទៅ ២១លើក​ចំ​គោលដៅ ៨​លើក ​ខណៈ Juventus មានឱកាស​តែ ៨លើក​ចំ​គោលដៅ ២លើក​។ ​តែ Chelsea ក៏​មាន​ក្តី​បារម្ភ​ដែរ​មុន​ពេល​ជួប​ជាមួយ Manchester United ចុង​សប្តាហ៍​នេះ​ដោយសារ​កីឡាករ​ ២​នាក់​មាន​រ​បួស​ ពោល​គឺ N’Golo Kante ត្រូវ​បាន​ប្តូរ​ចេញ​ក្រោយ​ចប់​វគ្គ​ទី ១ ឯ Ben Chilwell ក៏​ត្រូវ​ប្តូរ​ចេញ​នៅ​វគ្គ​ទី២​។​

​​ជ័យជំនះ​នេះ​ធ្វើ​ឱ្យ Chelsea ឡើង​មក​លេខ ១ ក្នុង​ពូ​ល​វិញ​មាន ១២ពិន្ទុ​ខណៈ Juventus ធ្លាក់​មក​លេខ ២ តែមាន ១២ពិន្ទុ​ដូចគ្នា​ពោល​គឺ​ក្រុម​ទាំងពីរ​ដឹក​ដៃ​គ្នា​ឡើង​វគ្គ ១៦ក្រុម​ចុងក្រោយ​ទៅ​ហើយ ​រង់​ចាំ​តែ​ប្រកួត​ចុងក្រោយ​ដើម្បី​សំរេច​ថា​ក្រុម​ណា​លេខ ១​។ ​មួយ​គូ​ទៀត​ក្នុង​ពូ​ល​នេះ Malmo និង Zenit St. Petersburg បាន​ត្រឹម​ស្មើគ្នា ១-១​។ ​ចំណែក​ឯ​មួយ​ពូ​ល​ទៀត​គឺ​ពូ​ល G បួន​ក្រុម​កំពុង​ប្រទាញ​ប្រទង់​គ្នា​ក្រោយពេល Lille យកឈ្នះ RB Salzburg ១-០ និង Sevilla យកឈ្នះ Wolfsburg ២-០​។ ​Lille ឡើង​មក​នាំ​មុខ​គេ​ក្នុង​ពូ​ល G នេះ​មាន ៨ពិន្ទុ​ទំលាក់ Salzburg ទៅ​លេខ ២ មាន ៧​ពិន្ទុ​ឯ Sevilla ឈរ​លេខ ៣ មាន ៥ពិន្ទុ​ទំលាក់ Wolfsburg ទៅ​លេខ ៤ មាន ៥ពិន្ទុ​៕

​អត្ថបទ​៖​នាង សុភា​វុ​ធ