យានអវកាស Starship ដ៏ធំរបស់ក្រុមហ៊ុន SpaceX បានផ្ទុះនៅក្នុងលំហកាលពីថ្ងៃព្រហស្បតិ៍ (០៦ មីនា) ប៉ុន្មាននាទីប៉ុណ្ណោះបន្ទាប់ពីហោះចេញពីរដ្ឋតិចសាស់ របស់សហរដ្ឋអាមេរិក ដោយជំរុញឱ្យអាជ្ញាធរអាកាសចរណ៍ FAA បញ្ឈប់ចរាចរណ៍ផ្លូវអាកាសនៅក្នុងផ្នែកខ្លះនៃរដ្ឋ Florida នៅក្នុងការបរាជ័យជាប់ៗគ្នាជាលើកទីពីរក្នុងឆ្នាំនេះ សម្រាប់កម្មវិធីរ៉ូកែត Mars របស់មហាសេដ្ឋី Elon Musk។

វីដេអូជាច្រើននៅលើប្រព័ន្ធផ្សព្វផ្សាយសង្គមបានបង្ហាញពីកម្ទេចកម្ទីដែលកំពុងឆាបឆេះ ធ្លាក់ចុះកាត់ផ្ទៃមេឃពេលព្រលប់នៅជិតភាគខាងត្បូងរដ្ឋ Florida និង Bahamas ក្រោយយាន Starship បានផ្ទុះឡើងក្នុងលំហ មិនយូរប៉ុន្មានបន្ទាប់ពីចាប់ផ្តើមវិលខ្ញាល់មិនអាចគ្រប់គ្រងបាន នៅពេលផ្ដាច់ពីម៉ាស៊ីន នេះបើតាមការផ្សាយបន្តផ្ទាល់បេសកកម្មរបស់ SpaceX។

បរាជ័យនៃការធ្វើតេស្តយាន Starship ទី៨ នេះបានកើតឡើងតែជាងមួយខែប៉ុណ្ណោះបន្ទាប់យានទី៧ ក៏បានបញ្ចប់ដោយការផ្ទុះបែបនេះដែរ ហើយឧប្បត្តិហេតុនេះក៏បានកើតឡើងនៅក្នុងដំណាក់កាលបេសកកម្មដំបូងដែល SpaceX ធ្លាប់បានយកឈ្នះយ៉ាងងាយស្រួលកាលពីមុន ក្នុងជំហានថយក្រោយជាថ្មីលើកម្មវិធីយានអវកាសរបស់លោក Musk។

នៅក្នុងសេចក្តីថ្លែងការណ៍មួយកាលពីល្ងាចថ្ងៃព្រហស្បតិ៍ ក្រុមហ៊ុន SpaceX បាននិយាយថា យាន Starship នេះបានជួប "ភាពមិនប្រក្រតី" នៅក្នុងផ្នែកខាងក្រោយរបស់យាន ដែលបណ្តាលឱ្យបាត់បង់ដំណើរការម៉ាស៊ីនជាច្រើន៕