ការបញ្ឈប់ការងារដែលប្រកាសដោយនិយោជកអាមេរិក បានកើនឡើងដល់កម្រិតមិនធ្លាប់ឃើញពីមុនមកចាប់តាំងពីវិបត្តិសេដ្ឋកិច្ចពីរលើកចុងក្រោយ ស្របពេលមានកិច្ចប្រឹងប្រែងបន្ថយកម្លាំងពលកម្មរបស់រដ្ឋាភិបាលសហព័ន្ធដ៏ធំ ការលុបចោលកិច្ចសន្យាការងារ និងការភ័យខ្លាចនៃសង្គ្រាមពាណិជ្ជកម្ម ដោយនេះបានផ្តល់សញ្ញាច្បាស់លាស់បំផុតនៃចំនួនជនរងគ្រោះដ៏ច្រើនលើទីផ្សារការងារ ព្រោះតែគោលនយោបាយរបស់រដ្ឋបាលលោកប្រធានាធិបតី Donald Trump។

ក្រុមហ៊ុនផ្គត់ផ្គង់ទីផ្សារសកល Challenger និង Grey & Christmas បាននិយាយកាលពីថ្ងៃព្រហស្បតិ៍ (០៦ មីនា) ថា ការកាត់បន្ថយបុគ្គលិកដែលគ្រោងទុកនោះឡើងដល់ ២៤៥% ត្រឹមតួលេខ ១៧២.០១៧មុខតំណែង កាលពីខែមុន ដែលជាកម្រិតខ្ពស់បំផុតតាំងពីខែកក្កដា ឆ្នាំ២០២០មក នៅពេលសេដ្ឋកិច្ចស្ថិតក្នុងវិបត្តិជំងឺរាតត្បាតកូវីដ១៩។ នេះក៏ជាចំនួនសរុបក្នុងខែកុម្ភៈខ្ពស់បំផុត គិតចាប់តាំងពីវិបត្តិសេដ្ឋកិច្ចដ៏ធំកាលពី ១៦ឆ្នាំមុនមក។

រដ្ឋាភិបាលផ្ទាល់ជាអ្នកបញ្ឈប់ការងារភាគច្រើន ដោយក្រុមហ៊ុន Challenger បានតាមដានឃើញតួលេខ ៦២.២៤២មុខតំណែង ដែលត្រូវបានប្រកាសកាត់បន្ថយដោយរដ្ឋាភិបាលសហព័ន្ធចំនួន ១៧ទីភ្នាក់ងារផ្សេងៗគ្នា។ រដ្ឋាភិបាលក៏បានបញ្ឈប់បុគ្គលិកប្រហែល ៦២.៥៣០នាក់ ក្នុងរយៈពេលពីរខែដំបូងនៃឆ្នាំនេះ ដោយកើនឡើងយ៉ាងខ្លាំងបំផុតបើធៀបនឹងរយៈពេលដូចគ្នាក្នុងឆ្នាំ២០២៤។

ក្រសួងប្រសិទ្ធភាពរដ្ឋាភិបាលរបស់មហាសេដ្ឋីបច្ចេកវិទ្យា Elon Musk ឬហៅថា DOGE កំពុងចង់កាត់បន្ថយការចំណាយសាធារណៈ ដែលជាជំហានមួយបណ្តាលឱ្យមានការបង្កកមូលនិធិ ផ្ដាច់ការចំណាយយ៉ាងច្រើន និងការបោសសម្អាតបុគ្គលិករដ្ឋាភិបាលសហព័ន្ធរាប់ម៉ឺននាក់ រួមទាំងអ្នកវិទ្យាសាស្ត្រ និងបុគ្គលិកនៅវិស័យសំខាន់ៗជាច្រើនទៀត៕