នាយករដ្ឋមន្ត្រីហុងគ្រី លោក Viktor Orbán បានជ្រើសរើសមិនគាំទ្រ ដោយការវេតូលើសេចក្ដីបិទបញ្ចប់រួមរបស់សហភាពអឺរ៉ុប ស្តីពីការគាំទ្រដល់អ៊ុយក្រែន នៅក្នុងកិច្ចប្រជុំកំពូលដ៏តានតឹងមួយនៅទីក្រុងប្រ៊ុចសែល ដោយបង្ខំឱ្យសេចក្តីថ្លែងការណ៍ទាំងនោះត្រូវបានអនុម័តដោយរដ្ឋសមាជិកចំនួន២៦ ដែលនៅសល់។

ជាមួយគ្នានេះដែរ មេដឹកនាំទាំងអស់ បានយល់ព្រមលើសេចក្តីថ្លែងការណ៍ស្តីពីការពង្រឹងការការពារសមូហភាពរបស់ប្លុកនេះ ដោយដៅលើគំនិតផ្តួចផ្តើម ៥ចំណុច ដែលបានបង្ហាញកាលពីដើមសប្តាហ៍នេះ ដោយប្រធានគណៈកម្មការអឺរ៉ុប លោកស្រី Ursula von der Leyen ក្នុងគោលបំណងចាក់បញ្ចូលសាច់ប្រាក់ថ្មីក្នុងការបំពាក់អាវុធឡើងវិញឱ្យទ្វីបអឺរ៉ុប។

ថ្លែងទៅកាន់អ្នកសារព័ត៌មានកាលពីល្ងាចថ្ងៃព្រហស្បតិ៍ ប្រធានក្រុមប្រឹក្សាអឺរ៉ុប លោក Antonio Costa បានការពារការរួបរួមរបស់ប្លុក ដោយនិយាយថា "ហុងគ្រីគឺឯកោ ហើយចំនួន ២៦ គឺច្រើនជាងមួយ" ដោយសំដៅដល់ប្រទេសដែលគាំទ្រសេចក្ដីថ្លែងការណ៍អំពីអ៊ុយក្រែន។

ជំនួបកំពូលវិសាមញ្ញនេះ ត្រូវបានកោះប្រជុំជាដំបូង ដើម្បីឆ្លើយតបទៅនឹងកិច្ចចរចារវាងសហរដ្ឋអាមេរិក និងរុស្ស៊ី ស្តីពីអនាគតរបស់អ៊ុយក្រែន ហើយត្រូវបានចាត់ទុកថាជាការបង្ហាញរួមគ្នានៃឆន្ទៈរបស់សហភាពអឺរ៉ុប ក្នុងការបង្កើនកិច្ចខិតខំប្រឹងប្រែងរបស់ខ្លួន គាំទ្រអ៊ុយក្រែនក្នុងរយៈពេលខ្លី និងធានាស្វ័យភាពជាយុទ្ធសាស្ត្រដើម្បីការពារខ្លួនក្នុងរយៈពេលវែង៕