ក្នុងឱកាសទិវាអន្តរជាតិនារី ៨មីនា ក្រុមកម្មការនីរោងចក្រ បានបង្ហាញការអបអរសាទរ និងសម្តែងការអរគុណជូនចំពោះថ្នាក់ដឹកនាំគ្រប់ជាន់ថ្នាក់នៃរាជរដ្ឋាភិបាលកម្ពុជា និងភាគីនិយោជក ដែលរហូតមកដល់នេះតែងតែយកចិត្តទុកដាក់ និងឲ្យតម្លៃជានិច្ចទៅដល់ស្រ្តីក្នុងវិស័យការងាររោងចក្រ ជាពិសេសការផ្តល់នូវកិច្ចគាំពារសង្គម និងអត្ថប្រយោជន៍ផ្សេងៗជាច្រើនថែមទៀត។

អ្នកស្រី នីម ថាវី សមាជិកសភាសម្ព័ន្ធសហជីពជាតិកម្ពុជា (NACC) ក្នុងបទសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី៧ ខែមីនា បានលើកឡើងថា មកដល់បច្ចុប្បន្ននេះ ស្រ្តីមិនត្រឹមតែត្រូវបានលើកកម្ពស់សិទ្ធិនោះទេ ថែមទាំងទទួលបានការយកចិត្តទុកដាក់យ៉ាងពេញលេញពីសំណាក់រាជរដ្ឋាភិបាលកម្ពុជា មិនថាទាំងឱកាសការងារ និងកិច្ចគាំពារសង្គមទេ ស្រ្តីតែងត្រូវបានគិតគូរជានិច្ចពីសំណាក់ថ្នាក់ដឹកនាំ។ អ្នកស្រី បានបន្តថា ក្រៅតែពីអត្ថប្រយោជន៍ ស្រ្តីនៅក្នុងវិស័យកាត់ដេរតែងទទួលបានភាពកក់ក្តៅពីសំណាក់ប្រមុខរាជរដ្ឋាភិបាល មានដូចជា ការចុះសួរសុខទុក្ខកម្មករនិយោជិត ជាពិសេសស្រ្តីមានផ្ទៃពោះត្រូវបានទទួលបានការឧបត្ថម្ភពីប្រមុខរាជរដ្ឋាភិបាលផ្ទាល់មកទល់បច្ចុប្បន្នផងដែរ។

ដោយឡែក ក្រុមកម្មការិនីបម្រើការងារនៅរោងចក្រកាត់ដេរសម្លៀកបំពាក់ក្រុមហ៊ុន ជា វៃ ស្ថិតនៅសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ បាននិយាយថា សព្វថ្ងៃនេះ ទាំងការរស់នៅ ការនិយាយស្តី និងការបំពេញការងារ គឺពោរពេញទៅដោយសេចក្តីសប្បាយរីករាយ ដោយមិនមានការរើសអើងពីសំណាក់ក្រុមបុរសនោះទេ។ ក្រុមកម្មការិនី បានសម្តែងការអរគុណ ជូនចំពោះរាជរដ្ឋាភិបាលកម្ពុជា ដែលតែងតែបានគិតគូរពីសុខទុក្ខរបស់កម្មករនិយោជិត តាមរយៈការដាក់ចេញនូវគោលការណ៍នានា សំដៅរក្សាឲ្យបាននូវសុខដុមរមនាក្នុងទំនាក់ទំនងវិជ្ជាជីវៈ និងការទទួលបាននូវសុខមាលភាពសង្គម និងអត្ថប្រយោជន៍ផ្សេងៗ។

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្តាលវិជ្ជាជីវៈ បានមានប្រសាសន៍ថា សមភាពរវាងបុរស និងស្ត្រី គឺជាកិច្ចការស្នូលនៃគោលនយោបាយរបស់រាជរដ្ឋាភិបាលកម្ពុជានៅគ្រប់នីតិកាល ពោលគឺ សម្ដេចតជោ និងសម្ដេចធិបតី ដែលតែងតែបានគិតគូរផ្តល់តម្លៃ និងយកចិត្តទុកដាក់ខ្ពស់ក្នុងការលើកកម្ពស់ស្ត្រីដោយការផ្តល់ “សិទ្ធិ សមភាព និងភាពអង់អាច ចំពោះស្រ្តីនិងក្មេងស្រីគ្រប់រូប”។ ឯកឧត្តម បានបន្ថែមថា ស្ត្រីជាចំណែកដ៏សំខាន់មួយនៃការកសាងអរិយធម៌កម្ពុជា និងវឌ្ឍនភាពនៃសង្គម ដោយក្នុងពេលបច្ចុប្បន្ននេះ ស្ត្រីកម្ពុជាក៏នៅតែបន្តដើរតួនាទីយ៉ាងសំខាន់សម្រាប់យើងទាំងអស់គ្នា។

បច្ចុប្បន្ននេះ នៅប្រទេសកម្ពុជាមានស្ត្រីជាច្រើនកំពុងតែបម្រើការងារស្ទើរគ្រប់វិស័យ ដោយគិតត្រឹមខែកុម្ភៈ ឆ្នាំ២០២៥ នៅក្នុងវិស័យកាត់ដេរ មានកម្មករនិយោជិតសរុបប្រមាណ ៩២ម៉ឺននាក់ ក្នុងនោះមានស្ត្រីចំនួនប្រមាណ ៧០ម៉ឺននាក់ ស្មើនឹងប្រមាណជាង ៧៦ភាគរយ។ នៅក្រៅវិស័យកាត់ដេរ ក្នុងចំណោម កម្មករនិយោជិតសរុបជាង ៩០ម៉ឺននាក់ មានស្ត្រីប្រមាណ ៣៧ម៉ឺននាក់ ស្មើនឹង ៤១ភាគរយ៕ អត្ថបទ៖ ឈិត បូរ៉ាវី