សារព័ត៌មាននយោបាយរបស់សហរដ្ឋអាមេរិក បាននិយាយថា ប្រធានាធិបតី លោក Donald Trump បានកំណត់សិទ្ធិអំណាចរបស់ លោក Elon Musk លើបុគ្គលិករបស់ក្រសួងនានានិងទីភ្នាក់ងារសហព័ន្ធ។ មហាសេដ្ឋីបច្ចេកវិទ្យារូបនេះ មានវត្តមាននៅក្នុងកិច្ចប្រជុំនៃសមាជិកគណៈរដ្ឋមន្ត្រី និងអ្នកផ្សេងទៀតដែល លោក Trump បានកោះប្រជុំ កាលពីថ្ងៃព្រហស្បតិ៍។

លោក Musk ដឹកនាំ ក្រសួងប្រសិទ្ធភាពរដ្ឋាភិបាល ឬ DOGE ដែលមានភារកិច្ចកាត់បន្ថយការងារ និងការចំណាយរបស់រដ្ឋាភិបាល។

សារព័ត៌មាន Politico បានដកស្រង់សម្តីមន្ត្រីរដ្ឋបាលដោយនិយាយថា លោក Trump បានប្រាប់គណៈរដ្ឋមន្ត្រីរបស់លោកថា «លោក Musk ត្រូវបានផ្តល់សិទ្ធិអំណាចដើម្បីផ្តល់អនុសាសន៍ដល់ក្រសួងនានា ប៉ុន្តែមិនចេញសេចក្តីសម្រេចជាឯកតោភាគីលើបុគ្គលិកនិងគោលនយោបាយទេ»។ គេហទំព័រព័ត៌មាន ក៏បានដកស្រង់ប្រភពព័ត៌មាន ដែលបាននិយាយថា លោក Musk បានទទួលស្គាល់ថាក្រសួងប្រសិទ្ធភាពរដ្ឋាភិបាល បានធ្វើឲ្យមានកំហុសមួយចំនួន។

ក្រោយមក លោក Trump បានប្រាប់អ្នកសារព័ត៌មានថា លោក បានណែនាំសមាជិកគណៈរដ្ឋមន្ត្រីរបស់លោក ឱ្យរក្សា «មនុស្សល្អ» ដែលពួកគេត្រូវការ។ លោកចង់ឲ្យបុគ្គលិកទាំងនោះ «ធ្វើការងារឲ្យបានល្អបំផុតដែលពួកគេអាចធ្វើបាន»។ វាកាន់តែប្រសើរសម្រាប់សមាជិកគណៈរដ្ឋមន្ត្រី ក្នុងកាត់បន្ថយកម្លាំងការងាររបស់សហព័ន្ធ ប៉ុន្តែបាននិយាយបន្ថែមថា ប្រសិនបើពួកគេមិនធ្វើទេ លោក Elon Musk នឹងកាត់បន្ថយបុគ្គលិកដោយខ្លួនឯង។