ទីភ្នាក់ងារកុមាររបស់អង្គការសហប្រជាជាតិ និយាយថា ទីភ្នាក់ងារកំពុងបើកកន្លែងសិក្សាបណ្តោះអាសន្នសម្រាប់កុមារនៅតំបន់ហ្កាហ្សាស្ទ្រីប។ ប៉ុន្តែទីភ្នាក់ងារនេះបានកត់សម្គាល់ថា កុមារកំពុងទទួលរងភាពតក់ស្លុត និងព្រួយបារម្ភអំពីថាតើ បទឈប់បាញ់រវាងអ៊ីស្រាអែល និងក្រុមហាម៉ាស នឹងនៅបន្តឬយ៉ាងណា។

មូលនិធិកុមាររបស់អង្គការសហប្រជាជាតិ(UNICEF)បានប៉ាន់ប្រមាណថា ជាង៩០ ភាគរយនៃសាលារៀននៅតំបន់ហ្កាហ្សាបានខូចខាត ឬត្រូវបានបំផ្លាញ ដោយសារតែការវាយប្រហាររបស់អ៊ីស្រាអែល។ ទីភ្នាក់ងារនិយាយថា សាលារៀនមួយចំនួនដែលបានរួចពីការវាយប្រហារ នៅតែត្រូវបានប្រើប្រាស់ជាទីជម្រក។

អង្គការយូនីសេហ្វ កំពុងបង្កើតកន្លែងរៀនបណ្ដោះអាសន្ននៅតំបន់ហ្កាហ្សាស្ទ្រីប ដើម្បីផ្តល់លទ្ធភាពដល់កុមារអាចសិក្សាឡើងវិញបាន។ ទីភ្នាក់ងារនេះនិយាយថា កន្លែងសិក្សាភាគច្រើនស្ថិតនៅក្នុងតង់ ហើយកុមារអាចរៀនភាសាអារ៉ាប់ ភាសាអង់គ្លេស គណិតវិទ្យា និងមុខវិជ្ជាផ្សេងៗទៀត។ ជាមួយគ្នានេះ ទីភ្នាក់ងារក៏បានផ្តល់ឱ្យកុមារនូវសម្ភារៈ កាបូបរៀន និងអាហារបំប៉ន។

មន្ត្រីអង្គការយូនីសេហ្វ បាននិយាយថា កន្លែងសិក្សា ជាកន្លែងដែលកុមារអាចទទួលបាន «ការរំសាយទុក្ខ» មួយផ្នែក។ ប៉ុន្តែបានបញ្ជាក់ថា កុមារជាច្រើនកំពុងមានសញ្ញាពីការរងរបួសផ្លូវចិត្តធ្ងន់ធ្ងរ ដោយសារតែការប្រយុទ្ធគ្នា។ មន្ត្រីទីភ្នាក់ងារ និយាយថា កុមារមួយចំនួនបានដកខ្លួនចេញ ហើយឈប់និយាយ ខណៈអ្នកផ្សេងទៀតញ័រខ្លួន ឬស្រែក នៅពេលពួកគេឮសំឡេងវាយប្រហារដោយយានដ្រូន។