អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បាននិយាយនៅក្នុងសន្និសីទសារព័ត៌មានមួយថា ទីក្រុងមូស្គូ នឹងចាត់វិធានការទប់ទល់បន្ថែមប្រឆាំងនឹងប្រទេសជប៉ុន ក្នុងករណីដែលទីក្រុងតូក្យូនៅតែបន្តគាំទ្ររបបទីក្រុងគីវ។

កាលពីថ្ងៃទី ០៣ ខែមីនា ក្រសួងការបរទេសរុស្ស៊ី បានប្រកាសហាមប្រាមពលរដ្ឋជប៉ុនចំនួន ៩នាក់រួមទាំងរដ្ឋមន្ត្រីការបរទេសលោក Takeshi Iwaya ជាចំណាត់ការសងសឹកចំពោះគោលនយោបាយដាក់ទណ្ឌកម្មរបស់ទីក្រុងតូក្យូ។

អ្នកការទូតរូបនេះ បានបញ្ជាក់ថា៖«ចំណាត់ការនាពេលថ្មីៗនេះរបស់យើង ក្នុងការចេញបម្រាមដែលអនុវត្តជាពិសេសចំពោះរដ្ឋមន្ត្រីការបរទេសជប៉ុន គឺជាវិធានការតបត ដែលកើតចេញពីគោលនយោបាយអរិភាពរបស់ទីក្រុងតូក្យូ ដែលរួមបញ្ចូលនូវអ្វីដែលគេហៅថា កញ្ចប់ទណ្ឌកម្ម និងសម្ភារៈផ្ទាល់ ជំនួយបច្ចេកទេស យោធា និងឧស្សាហកម្មដល់របបក្រុងគីវ។ ប្រសិនបើជប៉ុនរក្សាគោលនយោបាយការបរទេសបច្ចុប្បន្ន យើងនឹងបន្តអនុវត្តវិធានការតបត»។

អ្នកស្រី Zakharova បានសង្កត់ធ្ងន់ថា ដើម្បីបន្តកិច្ចសន្ទនាពេញលេញ និងកិច្ចសហប្រតិបត្តិការដែលមានផលប្រយោជន៍ទៅវិញទៅមក ជាមួយទីក្រុងមូស្គូ ទីក្រុងតូក្យូចាំបាច់ត្រូវបោះបង់ចោលទាំងស្រុងនូវការប៉ុនប៉ងធ្វើឲ្យប៉ះពាល់ដល់សេដ្ឋកិច្ច និងសន្តិសុខរបស់រុស្ស៊ី។

អ្នកនាំពាក្យក្រសួងការបរទេសរុស្ស៊ី បានបន្ថែមថា ទីក្រុងមូស្គូនឹងមិនធ្វើសេចក្តីលម្អិតនៃការរឹតបន្តឹងផ្ទាល់ខ្លួនប្រឆាំងនឹងពលរដ្ឋជប៉ុនជាសាធារណៈនោះទេ។