​បាល់បោះ៖ ​កីឡាករ Kevin Durant រក​បាន ២៧​ពិន្ទុ​ម្នាក់ឯង​ស្រប​ពេល Brooklyn Nets យកឈ្នះ Cleveland Cavaliers លទ្ធផល ១១៧-១១២ ការប្រកួត​បាល់បោះ​ក្រប​ខណ្ឌ NBA សហរដ្ឋអាមេរិក​។

​​នេះ​ជា​ការ​វិល​មកវិញ​សំរាប់ Kevin Durant ដែល​អវត្តមាន​មួយ​ប្រកួត​ដោយសារ​របួស​ស្មា​ខាងស្តាំ ខណៈ​ដែល​ការរកបាន ២៧ពិន្ទុ​នេះធ្វើឱ្យ​រំកិល​ខ្វះ​តែ ១ពិន្ទុ​ទៀត​ប៉ុណ្ណោះ​នឹង​ទាន់ Alan Iverson ក្នុង​តារាង​អ្នករក​ពិន្ទុ​បាន​ច្រើនជាងគេ​ចំណាត់ថ្នាក់​លេខ ២៥ ដោយ​រកបាន​សរុប ២៤៣៦៧ពិន្ទុ​ក្នុង​អាជីព​។ ​ចំណែក​ជ័យជំនះ​របស់ Brooklyn Nets នេះ​ក៏​ជា​ជ័យជំនះ ៦ ក្នុងចំណោម ៧ប្រកួត​ចុង​ក្រោយ​ផង​ដែរ​។ ​ចំណែក Cleveland Cavaliers កីឡាករ Darius Garland រកបាន ២៤ពិន្ទុ និង Jared Allen រកបាន ២០ពិន្ទុ​ផ្សេងទៀត​តែ Cleveland នៅ​តែ​គេច​មិន​ផុតពី​បរាជ័យ ៤ប្រកួត​ជាប់​គ្នា​។

​​ងាក​មក​ក្រុម​បាល់បោះ Philadelphia បាន​យកឈ្នះ​ទៅលើ​ក្រុម​ម្ចាស់ផ្ទះ Sacramento Kings លទ្ធផល ១០២-៩៤ ទោះ​គ្មាន​វត្តមាន​កីឡាករ​ឆ្នើម Joel Embiid ក៏ដោយ​។ ​Joel Embiid បាន​អវត្តមាន​ពី​ការ​ប្រកួត ៨ប្រកួត​ជាប់​គ្នា​មកហើយ​ដោយសារ​ពាក់ព័ន្ធ​នឹង​រឿង​វិធាន​សុខាភិបាល​។​ ​កីឡាករ Tyrese Maxey រកបាន ២៤ពិន្ទុ​សំរាប់ Philadelphia ខណៈ Sacramento Kings កីឡាករ De’Aaron Fox រកបាន ២៣ពិន្ទុ​៕

​អត្ថបទ​៖​នាង សុភា​វុ​ធ