សិទ្ធិរបស់ស្ត្រី និងក្មេងស្រី នៅជុំវិញពិភពលោក កំពុងប្រឈមមុខនឹងការគំរាមកំហែងជាច្រើន។ នេះបើយោងតាមការសិក្សារបស់អង្គការសហប្រជាជាតិ (UN) ដែលបានចេញផ្សាយកាលពីថ្ងៃព្រហស្បតិ៍ (ទី៦ ខែមីនា) នៅមុនទិវាសិទ្ធិនារីអន្តរជាតិ ៨មីនា។

នៅក្នុងសេចក្តីប្រកាសព័ត៌មានរបស់ខ្លួន អង្គការស្ត្រីរបស់អង្គការសហប្រជាជាតិ (UN Women) បានឲ្យដឹងថា «ការគំរាមកំហែងដែលមិនធ្លាប់មានពីមុនមក និងកំពុងកើនឡើង នៅទូទាំងពិភពលោក» រួមមានកម្រិតកាន់តែខ្ពស់នៃការរើសអើង ការការពារផ្នែកច្បាប់ខ្សោយ និងការផ្តល់មូលនិធិមិនគ្រប់គ្រាន់ សម្រាប់កម្មវិធី និងស្ថាប័នដែលគាំទ្រ និងការពារស្ត្រី។

របាយការណ៍ចុងក្រោយរបស់អង្គការនេះ ដោយផ្អែកលើទិន្នន័យពី ១៥៩ប្រទេស បង្ហាញថា ស្ទើរតែ ១ភាគ៤ នៃរដ្ឋាភិបាលទូទាំងពិភពលោក បានរាយការណ៍ពីប្រតិកម្មប្រឆាំងនឹងសិទ្ធិស្ត្រី នៅឆ្នាំ២០២៤។

ជាមួយគ្នានេះ ការសិក្សាបានបង្ហាញពីវឌ្ឍនភាព ជុំវិញតំណាងស្ត្រី នៅក្នុងសភាជាតិ ដែលបានកើនឡើងទ្វេដង ចាប់តាំងពីឆ្នាំ១៩៩៥។ តែទោះជាយ៉ាងនេះក្ដី របាយការណ៍នេះ កត់សម្គាល់ថា ស្ទើរតែ ៣ភាគ៤ នៃសមាជិកសភាទាំងអស់ នៅតែជាបុរស។

របាយការណ៍ក៏បង្ហាញផងដែរថា កំណែទម្រង់ច្បាប់ចំនួន ១.៥៣១លើក បានស្វែងរកការជំរុញសមភាពយេនឌ័រ នៅជុំវិញពិភពលោក ចាប់តាំងពីឆ្នាំ១៩៩៥ តែបានរកឃើញថា ស្ត្រីនៅតែមានសិទ្ធិស្របច្បាប់ត្រឹមតែ ៦៤ភាគរយប៉ុណ្ណោះ ធៀបនឹងបុរស។ ទន្ទឹមនឹងនេះដែរ ការរកឃើញ បានបង្ហាញថា ចំនួនករណីនៃអំពើហិង្សាផ្លូវភេទ ក្នុងជម្លោះ បានកើនឡើង ៥០ភាគរយ ចាប់តាំងពីឆ្នាំ២០២២ ដោយស្ត្រី និងកុមារី មានចំនួន ៩៥ភាគរយនៃជនរងគ្រោះ។

នៅក្នុងរបាយការណ៍នេះ UN Women បង្ហាញពីរបៀបវារៈនៃវិធានការ សម្រាប់សមភាពយេនឌ័រដែលមានសសរស្តម្ភចំនួន៦ ដែលរួមមានបដិវត្តន៍ឌីជីថល សម្រាប់ស្ត្រី និងកុមារី ក៏ដូចជាវិធានការដោះស្រាយភាពក្រីក្រ អំពើហិង្សា សន្តិភាព និងសន្តិសុខ និងយុត្តិធម៌អាកាសធាតុ៕