អ្នកចរចា រវាងសម្ព័ន្ធអភិរក្សនិយម គឺគណបក្សសហភាពប្រជាធិបតេយ្យគ្រិស្តសាសនា និងសហភាពសង្គមគ្រិស្តសាសនា (CDU/CSU) ជាមួយនឹងក្រុមកណ្តាលនិយមឆ្វេងនិយម គឺគណបក្សសង្គមប្រជាធិបតេយ្យ (SPD) បានមានវឌ្ឍនភាពយ៉ាងល្អប្រសើរ ក្នុងសប្តាហ៍នេះ ដោយនៅក្នុងកិច្ចពិភាក្សាដំបូង ពួកគេបានព្រមព្រៀងដល់ការខ្ចីប្រាក់ក្នុងចំនួនរាប់រយពាន់លានអឺរ៉ូ ដើម្បីពង្រឹងដល់វិស័យយោធា (Bundeswehr) និងកែលម្អហេដ្ឋារចនាសម្ព័ន្ធដែលកំពុងជួបការលំបាក។

ការចរចាកំពុងដំណើរការទៅយ៉ាងលឿនរហ័ស។ ភាគីទាំងអស់ ធ្លាប់នៅក្នុងរដ្ឋាភិបាលរួមគ្នាកាលពីពេលមុន ដោយចុងក្រោយបំផុត ក្រោមការដឹកនាំរបស់លោកស្រីអធិការបតី Angela Merkel រហូតដល់ឆ្នាំ២០២១។ ដូច្នេះ ពួកគេមានមូលដ្ឋានរួមគ្នាច្រើន ប៉ុន្តែក៏មានការខ្វែងគំនិតលើបញ្ហាសំខាន់ៗជាច្រើនផងដែរ។

សម្ព័ន្ធគណបក្ស CDU/CSU និងបក្ស SPD ព្រមព្រៀងលើតម្រូវការបន្ទាន់ ក្នុងការវិនិយោគ និងពង្រឹងវិស័យយោធា នៅពេលដែលសហរដ្ឋអាមេរិក ហាក់ដូចជាងាកចេញពីអឺរ៉ុប។ ហើយជាមួយគ្នានេះ សម្ព័ន្ធ CDU/CSU កំពុងពិចារណាណែនាំឡើងវិញនូវកាតព្វកិច្ចយោធា ដែលត្រូវបានព្យួរនៅឆ្នាំ២១១។ តែគណបក្ស SPD មើលឃើញថា ការចុះឈ្មោះទ្រង់ទ្រាយធំ គឺពិបាកគ្រប់គ្រង ហើយកំពុងជំរុញឲ្យមានការចូលបម្រើកាតព្វកិច្ចយោធាដោយស្ម័គ្រចិត្ត។

ទាំងគណបក្ស CDU/CSU និង SPD យល់ស្របគ្នាថា អាល្លឺម៉ង់មានកាតព្វកិច្ចបន្តគាំទ្រប្រទេសអ៊ុយក្រែន។ មេដឹកនាំបក្ស CDU គឺលោក Friedrich Merz ដែលទំនងជាបានក្លាយជាអធិការបតីបន្ទាប់ បាននិយាយម្តងហើយម្តងទៀត ក្នុងការគាំទ្រផ្តល់មីស៊ីលតម្រង់គោលដៅរបស់អាល្លឺម៉ង់ Taurus ទៅអ៊ុយក្រែន ជាអ្វីដែលអធិការបតីខាងបក្ស SPD លោក Olaf Scholz បានបដិសេធមិនធ្វើ ដោយលើកហេតុផលថា មីស៊ីលរយៈចម្ងាយឆ្ងាយទាំងនេះអាចអូសអាល្លឺម៉ង់ឲ្យចូលទៅក្នុងសង្រ្គាម។

ជារួម តើការពិភាក្សា ដើម្បីបង្កើតរដ្ឋាភិបាលចម្រុះ អាចកើតឡើងដែរ ឬទេ? ខណៈដែលភាគីទាំងអស់ ត្រូវជជែកគ្នាលើបញ្ហាប្រឈមជាច្រើន ដែលមានដូចជា ទំនាក់ទំនងឆ្លងមហាសមុទ្រអាត្លង់ទិក អន្តោប្រវេសន៍ សុខុមាលភាព និងអត្ថប្រយោជន៍ សេដ្ឋកិច្ច និងពន្ធ រួមជាមួយនឹងការការពារអាកាសធាតុផងដែរ៕