កម្ទេចកម្ទីយានអវកាស Starship របស់ក្រុមហ៊ុនអវកាស SpaceX ដែលបានផ្ទុះនៅក្នុងលំហរអវកាសកាលពីថ្ងៃព្រហស្បតិ៍ រយៈពេលប៉ុន្មាននាទីប៉ុណ្ណោះបន្ទាប់ពីហោះចេញពីរដ្ឋ Texas របស់សហរដ្ឋអាមេរិក ត្រូវបានគេមើលឃើញដូចជាការផ្ទុះកាំជ្រួចផ្កាភ្ញីពីលើទីក្រុង Miami ។ 

វាគឺជាបរាជ័យ ២លើកជាប់ៗគ្នា ក្នុងឆ្នាំនេះ សម្រាប់កម្មវិធីរ៉ុក្កែត Mars របស់មហាសេដ្ឋីអាមេរិកលោក Elon Musk ។

រូបភាពវីដេអូឃ្លីបជាច្រើននៅលើបណ្តាញព័ត៌មាសង្គម ឃើញបំណែកផ្កាភ្ញីពាសពេញផ្ទៃមេឃនៅពេលព្រលប់ពីលើទីក្រុង Miami និងពីលើស្រុក Bahamas ក្រោយការផ្ទុះរបស់យានអវកាស Starship នៅលើលំហរអវកាស ។

បរាជ័យនៃការធ្វើតេស្តយាន Starship ទី៨ នេះបានកើតឡើង រយៈពេលតែជាង ១ខែប៉ុណ្ណោះបន្ទាប់ពីយានទី៧ ក៏បានបញ្ចប់ដោយការផ្ទុះបែបនេះដែរ ហើយឧប្បត្តិហេតុនេះក៏បានកើតឡើងនៅក្នុងដំណាក់កាលបេសកកម្មដំបូងដែលក្រុមហ៊ុន SpaceX ធ្លាប់បានយកឈ្នះយ៉ាងងាយស្រួលកាលពីមុន ក្នុងជំហានថយក្រោយជាថ្មីលើកម្មវិធីយានអវកាសរបស់លោក Musk ។

រដ្ឋបាលអាកាសចរណ៍សហព័ន្ធសហរដ្ឋអាមេរិក បានចេញបញ្ជាពុំឲ្យមានការហោះហើរនៅអាកាសយានដ្ឋានទីក្រុង Miami, Fort Lauderdale, Palm Beach និងទីក្រុង Orlandoដោយសារកម្ទេចកម្ទីនៃការបាញ់បង្ហោះយានអវកាស រហូតដល់វេលាម៉ោង ៨យប់ម៉ោងក្នុងស្រុក ៕