ក្រុមហ៊ុនអយស្ម័យយានជាតិបារាំង និយាយនៅថ្ងៃសុក្រនេះថា ការរកឃើញគ្រាប់បែកមិនទាន់ផ្ទុះនាសម័យសង្រ្គាមលោកលើកទី ២ បានបង្អាក់ដល់ចរាចរណ៍នាពេលព្រឹកចេញ-ចូលស្ថានីយ៍រថភ្លើងដ៏មមាញឹក Gare du Nord របស់ទីក្រុងប៉ារីស ។ 

ការបង្អាក់នេះ ធ្វើឲ្យប៉ះពាល់ដល់ផ្លូវរថភ្លើងក្រោមដីក្នុងស្រុក ផ្លូវរថភ្លើងដឹកអ្នកដំណើរ ហើយនិងរថភ្លើងថ្នាក់ជាតិ និងថ្នាក់អន្តរជាតិ រួមទាំងសេវាកម្មរថភ្លើង Eurostar ផងដែរ ។

ក្រុមហ៊ុន H Line ស្ថិតក្នុងចំណោមក្រុមហ៊ុនអយស្ម័យយានជាតិបារាំង និយាយនៅក្នុងការបង្ហោះសារលើបណ្តាញព័ត៌មានសង្គម Xថា ដោយសារការរកឃើញកាលពីយប់មិញនូវគ្រាប់បែកមិនទាន់ផ្ទុះនាសម័យសង្រ្គាមលោកលើកទី ២ អំឡុងការងារជួសជុលនៅជិតស្ថានីយ៍រថភ្លើង Paris Gare du Nord ចរាចរណ៍ត្រូវបានអាក់ខាន ចេញ-ចូលស្ថានីយ៍ Gare du Nord ។ ពួកគេបន្តថា ការយកគ្រាប់បែកចេញ ត្រូវបានស្នើសុំដោយក្រុមនគរបាលក្រុងប៉ារីស ។

ក្រុមហ៊ុន H line និយាយទៀតថា គ្រាប់បែកមិនទាន់ផ្ទុះនេះ ត្រូវបានរកឃើញនៅចម្ងាយប្រហែល ២,៥ គ.មក ពីស្ថានីយ៍រថភ្លើង ស្ថិតនៅកណ្តាលផ្លូវរថភ្លើងតែម្តង ។ ចរាចរណ៍របស់រថភ្លើង នឹងត្រូវអាក់ខានរហូតដល់ប្រតិបត្តិការដោះគ្រាប់បែក ត្រូវបានបញ្ចប់ ។

ខណៈពេលនោះដែរ នគរបាលបារាំង ពុំបានឆ្លើយតបភ្លាមៗនោះទេចំពោះសំណើសុំធ្វើសេចក្តីអត្ថាធិប្បាយជុំវិញការរកឃើញគ្រាប់បែកមិនទាន់ផ្ទុះនាសម័យសង្រ្គាមលោកលើកទី ២មួយនេះ ៕