ក្រសួងការបរទេសរុស្ស៊ី នៅថ្ងៃសុក្រ (ទី៧ ខែមីនា) បានឲ្យដឹងថា អនុរដ្ឋមន្ត្រីការបរទេសរុស្ស៊ី លោក Sergei Ryabkov បានពិភាក្សាអំពីកិច្ចប្រឹងប្រែងអន្តរជាតិ ដើម្បីដោះស្រាយស្ថានភាព ជុំវិញកម្មវិធីនុយក្លេអ៊ែររបស់អ៊ីរ៉ង់ ជាមួយឯកអគ្គរដ្ឋទូតអ៊ីរ៉ង់ លោក Kazem Jalali។

ក្រសួងបានប្រាប់ថា កិច្ចប្រជុំរបស់ឥស្សរជនទាំងនោះ បានធ្វើឡើងកាលពីថ្ងៃព្រហស្បតិ៍ (ទី៦ ខែមីនា)។ កាលពីថ្ងៃអង្គារ ទីភ្នាក់ងារសារព័ត៌មាន Bloomberg បានរាយការណ៍ថា ប្រទេសរុស្ស៊ី បានយល់ព្រមជួយរដ្ឋបាលរបស់ប្រធានាធិបតីអាមេរិក លោក Donald Trump ក្នុងការទាក់ទងជាមួយប្រទេសអ៊ីរ៉ង់ ពាក់ព័ន្ធនឹងបញ្ហាផ្សេងៗ ក្នុងនោះរួមទាំងកម្មវិធីនុយក្លេអ៊ែររបស់ទីក្រុងតេអេរ៉ង់ និងការគាំទ្ររបស់ខ្លួន ចំពោះការធ្វើសង្គ្រាមតំណាងប្រឆាំងសហរដ្ឋអាមេរិក ក្នុងតំបន់ផងដែរ។

ហើយកាលពីថ្ងៃពុធ វិមានក្រឹមឡាំង បានឲ្យដឹងថា ការជជែកគ្នា នាពេលខាងមុខ រវាងរុស្ស៊ី និងសហរដ្ឋអាមេរិក នឹងរួមបញ្ចូលការពិភាក្សាអំពីកម្មវិធីនុយក្លេអ៊ែររបស់អ៊ីរ៉ង់ផងដែរ ជាប្រធានបទដែលខ្លួន បាននិយាយថា ត្រូវបាន «លើកយកមកនិយាយត្រួសៗ» នៅក្នុងជុំដំបូងនៃកិច្ចចរចា រវាងមហាអំណាចទាំង២ កាលពីខែមុន។

គួររំលឹកថា កាលពីខែមុន លោក Trump បានចាប់ផ្ដើមឡើងវិញនូវយុទ្ធនាការ «ដាក់សម្ពាធអតិបរមា» របស់លោក លើអ៊ីរ៉ង់ ដែលរួមបញ្ចូលទាំងកិច្ចប្រឹងប្រែង ដើម្បីជំរុញការនាំចេញប្រេងរបស់ប្រទេសឲ្យធ្លាក់ ដល់កម្រិតសូន្យផងដែរ ដើម្បីរារាំងទីក្រុងតេអេរ៉ង់កុំឲ្យទទួលបានអាវុធនុយក្លេអ៊ែរ។ អ៊ីរ៉ង់បដិសេធរាល់ការមានបំណងបែបនេះ៕