នៅលើកំពូលភ្នំពណ៌បៃតងខៀវស្រងាត់ នៅព្រំដែនភាគខាងជើងនៃប្រទេសអ៊ីស្រាអែល ជាមួយប្រទេសលីបង់ អ្នកស្រី Carmela Keren Yakuti បង្ហាញមោទនភាពពីផ្ទះរបស់ខ្លួន នៅក្នុងសហគមន៍សហករណ៍ ដែលអ្នកស្រីបានភៀសខ្លួនចេញ កាលពីជាង ១៦ខែមុន ដោយសារការភ័យខ្លាចនៃការវាយប្រហាររបស់ក្រុមហេសបូឡា។

អ្នកស្រី Yakuti មានវ័យ ៤០ឆ្នាំ ដែលកំពុងឈរនៅលើរានហាលដែលទើបនឹងលាងស្អាត ហើយដកដង្ហើមស្រូបយកខ្យល់អាកាសដ៏ត្រជាក់ បាននិយាយថា៖«ឥឡូវនេះ អ្នករាល់គ្នា បានវិលត្រឡប់មកវិញ ហើយ ពិតជាមានអារម្មណ៍ដ៏អស្ចារ្យណាស់។

អ្នកស្រីបានបន្ថែមថា៖«វាអស្ចារ្យណាស់នៅទីនេះ។ យើងមានសហគមន៍សហករណ៍ដ៏ស្រស់ស្អាត ដែលមានទិដ្ឋភាពដ៏ស្រស់បំព្រង» ដោយសំដៅទៅលើអ្វីដែលអ៊ីស្រាអែលហៅថា សហគមន៍កសិកម្មតូចមួយ។ «វាពិតជាល្អណាស់ ដែលយើងបានត្រឡប់មកផ្ទះសម្បែងវិញ»។ 

នៅថ្ងៃទី ០៨ ខែតុលា ឆ្នាំ ២០២៣ មួយថ្ងៃបន្ទាប់ពីការវាយប្រហារដែលមិនធ្លាប់មានពីមុនមករបស់ក្រុម ហាម៉ាសលើភាគខាងត្បូងអ៊ីស្រាអែល បានបង្កឲ្យមានសង្រ្គាម នៅតំបន់ហ្កាហ្សា ក្រុមហេសបូឡានៅប្រទេសលីបង់ បានប្រកាសគាំទ្រដល់ក្រុមសកម្មប្រយុទ្ធប៉ាឡេស្ទីន ហើយបានចាប់ផ្តើមបាញ់រ៉ូកែតទៅកាន់ភាគខាងជើងអ៊ីស្រាអែល។

ដើម្បីការពារខ្លួនពួកគេ យោធាអ៊ីស្រាអែលបានបញ្ជាឲ្យអ្នកស្រី Yakuti ក្រុមគ្រួសារ មិត្តភក្តិ និងអ្នកជិតខាងរបស់ខ្លួន ចាកចេញពីសហគមន៍សហករណ៍ ហើយពួកគេត្រូវបានបញ្ជូនទៅរស់ នៅក្នុងសណ្ឋាគារមួយ ក្នុងទីក្រុង Tiberius នៅភាគខាងត្បូង។