ប្រធានាធិបតីអ៊ុយក្រែនលោក Volodymyr Zelenskiy នឹងជួបពិភាក្សា នៅអាហ្រ្វិកខាងត្បូង ជាមួយប្រធានាធិបតី លោក Cyril Ramaphosa នៅថ្ងៃទី១០ ខែមេសា។ នេះបើតាមអ្នកនាំពាក្យរបស់លោក Ramaphosa ដែលបាននិយាយនៅថ្ងៃសុក្រ (ទី៧ ខែមីនា) ខណៈដែលមេដឹកនាំអ៊ុយក្រែន ព្យាយាមកៀគរការគាំទ្រអន្តរជាតិ បន្ទាប់ពីសហរដ្ឋអាមេរិកបានបញ្ឈប់ជំនួយយោធាទាំងអស់។

អាហ្រ្វិកខាងត្បូងប្រឹងប្រែងបង្ហាញខ្លួនឯងថា ជាអ្នកមិនចូលបក្សសម្ព័ន្ធ ក្នុងសង្រ្គាមអ៊ុយក្រែន ប៉ុន្តែមានទំនាក់ទំនងល្អជាមួយរុស្ស៊ី ដោយប្រទេសទាំង២ ជាសមាជិករបស់ក្រុមប្រទេសមានសេដ្ឋកិច្ចរីកចម្រើន គឺ BRICS ដែលរួមមានប្រទេសចិន ឥណ្ឌា ប្រេស៊ីល និងប្រទេសដទៃទៀតផងដែរ ដែលកំពុងព្យាយាមប្រជែងនឹងសណ្តាប់ធ្នាប់សេដ្ឋកិច្ចគ្រប់គ្រងដោយលោកខាងលិច។

អាហ្រ្វិកខាងត្បូង បានបដិសេធមិនថ្កោលទោស ចំពោះការសម្រេចរបស់ប្រធានាធិបតីរុស្ស៊ី លោក Vladimir Putin ក្នុងការចូលលុកលុយអ៊ុយក្រែន កាលពី ៣ឆ្នាំមុន ហើយបានបដិសេធមិនបោះឆ្នោតលើសេចក្ដីសម្រេចរបស់អង្គការសហប្រជាជាតិ ស្តីពីសង្គ្រាមនេះ។

អ្នកនាំពាក្យ លោក Vincent Magwenya បានប្រាប់សារព័ត៌មានថា៖ «ដំណើរទស្សនកិច្ចនេះ គឺជាការបន្តនៃការចូលរួមជាបន្តបន្ទាប់ ដែលធ្វើឡើងដោយលោកប្រធានាធិបតី Ramaphosa ជាមួយលោកប្រធានាធិបតី Putin និងលោកប្រធានាធិបតី Zelenskiy លើដំណើរការរួមមួយ ដែលនឹងផ្តល់ផ្លូវមួយ ដើម្បីឆ្ពោះទៅការមានសន្តិភាព រវាងរុស្ស៊ី និងអ៊ុយក្រែន»៕