ភ្នំពេញ ៖ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយប្ញទ្ធិនារីកម្ពុជា ផ្ញើសារលិខិតគោរពថ្លែងអំណរគុណជូនសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលបានផ្ញើសារជូនពរលោកជំទាវបណ្ឌិត ក្នុងឱកាសខួបលើកទី ១១៤ នៃទិវាអន្តរជាតិនារី ៨ មីនា ឆ្នាំ ២០២៥ ក្រោមប្រធានបទ «សិទ្ធិ សមភាព និងភាពអង់អាចចំពោះស្រ្តី និងក្មេងស្រីគ្រប់រូប» ។ 

សារលិខិតថ្លែងអំណរគុណរបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងកាយសមាគមកាយប្ញទ្ធិនារីកម្ពុជា ដែលបានចេញផ្សាយនាថ្ងៃទី ៧ ខែមីនា ឆ្នាំ ២០២៥ បានរំលេចខ្លឹមសារបន្ថែមទៀតថា កិច្ចការងារលើកកម្ពស់សមភាពយេនឌ័រ និងតម្លៃស្រ្តី គឺជាកាតព្វកិច្ចចម្បងមួយដែលប្រទេសជាតិនីមួយៗ ត្រូវយកចិត្តទុកដាក់។ សារលិខិតដដែលបានបន្តថា៖ « ក្នុងនាមជាអគ្គស្នងការសមាគមកាយប្ញទ្ធិនារីកម្ពុជា នាងខ្ញុំសូមយកវេលាដ៏ឧត្តុងឧត្តមនៃទិវាអន្តរជាតិនារី ៨ មីនា ឆ្នាំ ២០២៥ នេះ បញ្ជាក់ជូនបន្ថែមថា ការលើកកម្ពស់សិទ្ធិ សមភាព និងបង្កើនភាពអង់អាចដល់ស្រ្តី និងក្មេងស្រី មិនត្រឹមតែជាកិច្ចការអាទិភាពដើម្បីឈានទៅសម្រេចគោលដៅអភិវឌ្ឍន៍ប្រកបដោយចីរភាព ប៉ុន្តែជាភាពចាំបាច់ ជាកាលានុវត្តភាព និងជាកាតាលីករថ្មីចូលរួមចំណែកពន្លឿនការសម្រេចបាននូវសមភាពយេនឌ័រ និងការអភិវឌ្ឍសេដ្ឋកិច្ច-សង្គម ប្រកបដោយចីរភាព និងបរិយាប័ន្ន។ 

ជាមួយគ្នានេះ លោកជំទាវបណ្ឌិតអគ្គស្នងការសមាគមកាយប្ញទ្ធនារីកម្ពុជា បានសម្ដែងនូវការគោរពដឹងគុណ និងកោតសរសើរដ៏ស្មោះស្ម័គ្របំផុត ចំពោះស្នាដៃដឹកនាំប្រទេសដ៏ឈ្លាសវៃបំផុត ប្រកបដោយភាពប្រាកដនិយម មនសិការស្រលាញ់ប្រទេសជាតិ និងប្រជាជន ព្រមទាំងការលះបង់គ្រប់បែបយ៉ាងមិនអាចប្រៀបផ្ទឹមបានរបស់សម្ដេចតេជោ ដោយសម្រេចបានសមិទ្ធផលជាច្រើនជូនជាតិមាតុភូមិ នារយៈកាលកន្លងមក ជាពិសេសការសម្រេចបាននូវការបង្រួបបង្រួមជាតិ ឯកភាពជាតិ និងសន្តិភាពពេញលេញ ព្រមទាំងធានាបាននូវស្ថិរភាពនយោបាយយូរអង្វែង និងការអភិវឌ្ឍលើគ្រប់វិស័យ។ 

ឆ្លៀតក្នុងឱកាសនេះ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយប្ញទ្ធិនារីកម្ពុជាក៏បានបួងសួងដល់ទេវតាឆ្នាំថ្មី គុណបុណ្យព្រះរតនត្រ័យ និងប្ញទ្ធិបារមីនៃវត្ថុស័ក្តិសិទ្ធិទាំងឡាយក្នុងលោក សូមប្រោះព្រំសព្ទសាធុការពរជ័យ បវរមហាប្រសើរថ្លៃថ្លា ជូនចំពោះសម្ដេចតេជោ ប្រធានព្រឹទ្ធសភា និងសម្ដេចកិត្តិព្រឹទ្ធបណ្ឌិត សូមបានប្រកបដោយសុខភាពល្អបរិបូណ៌ កម្លាំងពលំមាំមួនខ្លាំងក្លា បញ្ញាញាណភ្លឺថ្លាត្រចះត្រចង់ ជន្មាយុយឺនយូរ មានសុខសុភមង្គលក្នុងក្រុមគ្រួសារ និងសម្រេចជោគជ័យថ្មីៗបន្ថែមទៀតជូនព្រះរាជាណាចក្រកម្ពុជា៕