អង្គការសុខភាពពិភពលោក(WHO) បាននិយាយថា ពួកគេនឹងបញ្ជូនថ្នាំព្យាបាលជំងឺឃ្លង់ទៅកាន់ប្រទេសនីហ្សេរីយ៉ានៅចុងសប្តាហ៍នេះ ក្រោយដោះស្រាយការផ្អាកធ្វើតេស្តដែលនាំឲ្យមានការពន្យាពេលចែកចាយដល់អ្នកជំងឺរាប់ពាន់នាក់ រួមទាំងកុមារ ឲ្យទទួលបានឱសថដែលពួកគេត្រូវការ ដើម្បីការពារពិការភាព ។

នីហ្សេរីយ៉ា ដែលជាប្រទេសមានពលរដ្ឋច្រើនបំផុតនៅអាហ្វ្រិក បានរាយការណ៍អ្នកឆ្លងប្រចាំឆ្នាំជំងឺឃ្លង់ជាង ១ពាន់ករណី គឺជាជំងឺបង្កឡើងដោយសារប៉ាក់តេរី ហើយនិងធ្វើឲ្យប៉ះពាល់ភាគច្រើនលើស្បែក សសៃប្រសាទសាច់ដុំ និងភ្នែក ។

ជំងឺនេះអាចព្យាបាលបាន ដោយប្រើប្រាសវិធីព្យាបាលពហុឱសថ ប៉ុន្តែបើសិនជាគ្មានការព្យាបាលទេនោះ វានឹងនាំឲ្យកើតមានដំបៅក្លាយ និងពិការភាពដូចជាពិការភ្នែក និងខ្វិនជាដើម ។

នៅមន្ទីរពេទ្យ ERCC ស្ថិតក្នុងរដ្ឋ Nasarawa មានចម្ងាយប្រហែល ២០០គ.មភាគខាងលិចរដ្ឋធានី Abuja អ្នកជំងឺឃ្លង់ ២នាក់ ត្រូវបានទទួលការព្យាបាល ពេលដែលអ្នកសារព័ត៌មានរ៉យទ័រ បានធ្វើដំណើរទៅកាន់ទីនោះកាលពីខែកុម្ភៈ បន្ទាប់ពីអ្នកជំងឺ ២៦នាក់ផ្សេងទៀត ត្រូវបានបញ្ជូនឲ្យទៅផ្ទះវិញ ចាប់តាំងពីឆ្នាំមុនរហូតមក ដោយសារកង្វះខាតថ្នំាពេទ្យ ជាហេតុធ្វើឲ្យកើតមានហានិភ័យនៃការរីករាលដាលឆ្លងជំងឺឃ្លង់ ។

ទិន្នន័យពីអង្គការ WHO បង្ហាញថា នីហ្សេរីយ៉ា ស្ថិតក្នុងចំណោមប្រទេសចំនួន ១២ រាយការណ៍ករណីឆ្លងជំងឺឃ្លង់ប្រចាំឆ្នាំចន្លោះពី ១ពាន់នាក់ ដល់ ១ម៉ឺននាក់ បន្ទាប់ពីប្រេស៊ីល ឥណ្ឌា និងឥណ្ឌូនេស៊ី ៕