ប្រធានាធិបតីសហរដ្ឋអាមេរិក លោក Donald Trump បាននិយាយថា លោកបានសរសេរលិខិតទៅកាន់ប្រទេសអ៊ីរ៉ង់ ដើម្បីបើកកិច្ចពិភាក្សាស្តីពីការទប់ស្កាត់ការផលិតអាវុធនុយក្លេអ៊ែរ បើមិនដូច្នេះទេត្រូវប្រឈមមុខនឹងសកម្មភាពយោធា ដែលអាចកើតមាន។

លោក Trump បានថ្លែងទៅកាន់ប្រព័ន្ធផ្សព្វផ្សាយ Fox Business នៅក្នុងវីដេអូឃ្លីបមួយ ដែលបានចាក់ផ្សាយកាលពីថ្ងៃសុក្រថា «ខ្ញុំបានសរសេរសំបុត្រទៅឱ្យពួកគេដោយនិយាយថា ខ្ញុំសង្ឃឹមថា អ្នកនឹងចរចារ ព្រោះប្រសិនបើយើងមានចំណាត់ការផ្នែកយោធា វានឹងក្លាយជារឿងដ៏អាក្រក់សម្រាប់ពួកគេ»។ «អ្នកមិនអាចអនុញ្ញាតឱ្យពួកគេមានអាវុធនុយក្លេអ៊ែរបានឡើយ»។

កិច្ចព្រមព្រៀងដ៏សំខាន់ឆ្នាំ២០១៥ ដែលត្រូវបានគេស្គាល់ថាជាផែនការសកម្មភាពគ្រប់ជ្រុងជ្រោយរួម (JCPOA) បានដាក់ការទប់ស្កាត់លើកម្មវិធីនុយក្លេអ៊ែររបស់អ៊ីរ៉ង់ ជាថ្នូរនឹងការបន្ធូរបន្ថយទណ្ឌកម្ម។

កិច្ចព្រមព្រៀងនេះ បានដួលរលំបន្ទាប់ពី លោក Trump បានដកសហរដ្ឋអាមេរិកចេញពីកិច្ចព្រមព្រៀងក្នុងឆ្នាំ២០១៨ ក្នុងអាណត្តិប្រធានាធិបតីដំបូងរបស់លោក។ ទីក្រុងតេអេរ៉ង់ បានប្រកាន់ខ្ជាប់នូវកិច្ចព្រមព្រៀងនេះរហូតដល់មួយឆ្នាំបន្ទាប់ពីទីក្រុងវ៉ាស៊ីនតោនបានដកខ្លួនចេញ ប៉ុន្តែក្រោយមកបានចាប់ផ្តើមកាត់បន្ថយការប្តេជ្ញាចិត្តរបស់ខ្លួនជាបន្តបន្ទាប់។

លោក Trump ដែលបានវិលត្រឡប់ទៅកាន់សេតវិមានវិញក្នុងខែមករា បានដាក់ឡើងវិញនូវគោលនយោបាយ «សម្ពាធអតិបរមា» របស់លោកចំពោះទណ្ឌកម្មប្រឆាំងអ៊ីរ៉ង់ជុំវិញការចោទប្រកាន់ថាប្រទេសនេះ កំពុងស្វែងរកសមត្ថភាពអាវុធនុយក្លេអ៊ែរ។ ទីក្រុងតេអេរ៉ង់ បានបដិសេធជានិច្ចនូវការអះអាងនេះ និងបានបង្ហាញឆន្ទៈម្តងហើយម្តងទៀតក្នុងការស្តារកិច្ចព្រមព្រៀងឡើងវិញ ។