ប្រធានាធិបតីអ៊ុយក្រែន លោក Volodymyr Zelenskiy បានស្វាគមន៍កិច្ចពិភាក្សាដែលនៅបន្តជាមួយក្រុមការងាររបស់ ប្រធានាធិបតីសហរដ្ឋអាមេរិក លោក Trump និងការគាំទ្រជំនួយពីបណ្តាប្រទេសអឺរ៉ុប។ នៅក្នុងសុន្ទរកថា លោក Zelenskiy បាននិយាយថា «ការសន្ទនាតាមទូរស័ព្ទជាច្រើនលើក» ដែលធ្វើឡើងជាមួយអ្នកតំណាងរបស់លោក Trump បានផ្តោតលើ «សន្តិភាពឱ្យបានឆាប់តាមដែលអាចធ្វើទៅបាន»។

លោក Zelenskiy ក៏បានស្វាគមន៍ការជំរុញការគាំទ្រពីបណ្តាប្រទេសសហភាពអឺរ៉ុប រួមមានទាំងប្រទេសន័រវេស ហូឡង់ និងបារាំង ហើយបានថ្កោលទោសការវាយប្រហារដោយមីស៊ីលទ្រង់ទ្រាយធំលើកដំបូងរបស់រុស្ស៊ីលើហេដ្ឋារចនាសម្ព័ន្ធថាមពលនិងឧស្ម័ននៅក្នុងប្រទេសអ៊ុយក្រែនកាលពីពេលយប់ ចាប់តាំងពីសហរដ្ឋអាមេរិក បានផ្អាកការចែករំលែកព័ត៌មានសម្ងាត់ជាមួយអ៊ុយក្រែន។

ប្រជាប្រីយភាពរបស់ លោក Zelenskiy បានកើនឡើង១០ភាគរយ ចាប់តាំងពីជម្លោះនៅសេតវិមានជាមួយប្រធានាធិបតីអាមេរិក លោក Donald Trump ជាការស្ទង់មតិរបស់ក្រុមហ៊ុនស្ទង់មតិនាំមុខគេ នៅអ៊ុយក្រែន បានបង្ហាញ កាលពីថ្ងៃសុក្រ។ ការស្ទង់មតិដោយវិទ្យាស្ថានសង្គមវិទ្យាអន្តរជាតិទីក្រុងគីវ(KIIS) បានបង្ហាញថា ៦៧% នៃអ្នកឆ្លើយតប បានជឿទុកចិត្តលើ លោក Zelenskiy ដែលបានកើនឡើងពី ៥៧% កាលពីខែមុន។