មនុស្សរាប់ពាន់នាក់ បានចេញប្រមូលផ្តុំគ្នា «ក្រោកឈរគាំទ្រវិទ្យាសាស្ត្រ» នៅទីក្រុងវ៉ាស៊ីនតោនឌីស៊ី និងទីក្រុងញូវយ៉ក ដោយតវ៉ាប្រឆាំងការកាត់បន្ថយនិងការបង្កកមូលនិធិ និងការបណ្តេញបុគ្គលិកនៅទូទាំងក្រសួងវិទ្យាសាស្ត្រ ធ្វើឡើងដោយរដ្ឋបាលរបស់ប្រធានាធិបតី លោក Donald Trump ។

នៅក្នុងគំរូថ្មីៗ សហរដ្ឋអាមេរិកបានដកខ្លួនចេញពីក្រុមប្រឹក្សានៃមូលនិធិខូចខាតដោយអាកាសធាតុដែលបានពិភាក្សាយ៉ាងលំបាករបស់អង្គការសហប្រជាជាតិ ក្នុងការជួយដល់ប្រទេសក្រីក្រ និងប្រទេសងាយរងគ្រោះ ដើម្បីទប់ទល់ទៅនឹងគ្រោះមហន្តរាយ បណ្តាលមកពីបម្រែបម្រួលអាកាសធាតុ។

ចាប់តាំងពីចូលកាន់តំណែងក្នុងខែមករា លោក Trump បានបញ្ឈប់ការចូលរួមរបស់អ្នកវិទ្យាសាស្ត្រអាមេរិក ក្នុងការវាយតម្លៃអាកាសធាតុពិភពលោក ដោយបានដកខ្លួនចេញពីកិច្ចព្រមព្រៀងផ្តល់មូលនិធិ ដើម្បីជួយប្រទេសនានាកាត់បន្ថយការប្រើប្រាស់ធ្យូងថ្ម ហើយក៏បានដកប្រទេសនេះចេញពីកិច្ចព្រមព្រៀងអាកាសធាតុទីក្រុងប៉ារីស។ យោងតាមប្រភពពីសភា បានឱ្យដឹងថា រដ្ឋបាលមហាសាគរសាស្ត្រ និងបរិយាកាសជាតិ (NOAA) ជាទីភ្នាក់ងារផ្តល់ការព្យាករណ៍អាកាសធាតុរបស់រដ្ឋាភិបាលសហរដ្ឋអាមេរិក បានចាប់ផ្តើមបណ្តេញបុគ្គលិកជាង៨០០នាក់ កាលពីថ្ងៃទី២៧ខែកុម្ភៈ។ ប្រភពបាននិយាយថា បុគ្គលិកនៅវិទ្យាស្ថានជាតិស្បៀងអាហារ និងកសិកម្ម ដែលគាំទ្រការស្រាវជ្រាវវិទ្យាសាស្ត្រកសិកម្ម និងបច្ចេកវិទ្យា និងសេវាស្រាវជ្រាវសេដ្ឋកិច្ច ដែលបង្កើតរបាយការណ៍និងទិន្នន័យស្តីពីសេដ្ឋកិច្ចកសិកម្ម ក៏ត្រូវបានបណ្តេញចេញពីការងារផងដែរ។ បាតុករយ៉ាងហោចណាស់១.០០០នាក់ បានចេញតវ៉ានៅទីក្រុង San Francisco រដ្ឋកាលីហ្វ័រញ៉ា កាលពីថ្ងៃសុក្រ សម្រាប់ការប្រមូលផ្តុំគ្នា «ក្រោកឈរគាំ្រវិទ្យាសាស្រ្ត» ដើម្បីបង្ហាញពីការប្រឆាំងទៅនឹងការកាត់បន្ថយការផ្តល់និងការបង្កកមូលនិធិធ្វើឡើងដោយរដ្ឋបាល លោក Trump ។ ក្រុមអ្នកតវ៉ាបានស្រែកពាក្យស្លោកប្រឆាំងប្រធានាធិបតី លោក Trump និងមហាសេដ្ឋី លោក Elon Musk ដែលបានដឹកនាំកិច្ចខិតខំប្រឹងប្រែងកាត់បន្ថយថវិការបស់លោក Trump តាមរយៈក្រសួងប្រសិទ្ធភាពរដ្ឋាភិបាល (DOGE) ។