ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបពិភាក្សាការងារជាមួយបណ្តារោងម៉ាស៊ីនកិនស្រូវ នៅមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង នៅរសៀលថ្ងៃទី៧ ខែមីនា ឆ្នាំ២០២៥។

យោងតាមក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា កិច្ចប្រជុំនេះមានគោលបំណង​ពិនិត្យ​មើលស្ថានភាពការទម្លាក់ទុនពិសេសរបស់រាជរដ្ឋាភិបាលដល់រោងម៉ាស៊ីនកិនស្រូវក្នុងស្រុក ក្នុងការប្រើប្រាស់ ​ដើម្បីទិញស្រូវពីកសិករឱ្យមានប្រសិទ្ធភាពខ្ពស់ និងជួយដល់កសិករបាន​ពិតប្រាកដ។ ក្នុងរយៈពេលប៉ុន្មានឆ្នាំចុងក្រោយនេះ ​បង្ហាញថា ទុន​ពិសេសដែល​បញ្ចេញ​ដើម្បីរក្សា​ស្ថិរភាពថ្លៃ​ និងលំនឹងជីវភាពរបស់ប្រជាកសិករពិតជាមានប្រសិទ្ធភាពខ្ពស់។

ទន្ទឹមនឹងនេះ ​ឯកឧត្តមរដ្ឋមន្រ្តី បានលើកឡើងពីការធ្វើស្តង់ដាមួយដែលបម្រើផលប្រយោជន៍​សម្រាប់​ផលិតផលអង្ករក្រអូបប្រណីតរបស់កម្ពុជា និងនាំឱ្យកម្ពុជាមានឧត្តមភាពពិតប្រាកដនៅ​លើទីផ្សារអន្តរជាតិ។

ឯកឧត្តម បញ្ជាក់បន្ថែមថា ​ពូជស្រូវក្រអូបមានច្រើនប្រភេទរួមមានសែនក្រអូប ​ចំប៉ីស៧០ ស្រងែថ្មី ដែលរោងម៉ាស៊ីន​កិនស្រូវត្រូវផ្តល់តម្លៃដល់ពូជស្រូវក្នុងស្រុកនេះដូចគ្នា សំដៅទទួលបានផល​ប្រយោជន៍រួមគ្នារវាងកសិករដាំដុះ​ និងរោងម៉ាស៊ីន ​និងបង្កើនភាពជឿជាក់ជាមួយគ្នា។

ជាទីបញ្ចប់ ឯកឧត្តមរដ្ឋមន្រ្តី ​ណែនាំឱ្យរោងម៉ាស៊ីនកិនស្រូវក្នុងស្រុក ត្រៀមកំណត់នូវតម្រូវការ​បរិមាណស្រូវក្រអូបសម្រាប់ទីផ្សារដែលខ្លួនត្រូវការ ដើម្បីជាទិន្នន័យងាយស្រួល​ក្នុងការរៀបចំសហគមន៍​ឱ្យស្របទៅតាមការផ្គត់ផ្គង់ និងមានផែនការជាក់លាក់៕