នៅថ្ងៃសៅរ៍នេះ ចិនបានប្រកាសការដំឡើងពន្ធតម្លៃជាង ២,៦ពាន់លានដុល្លារលើផលិតផលស្បៀងអាហារ និងកសិកម្មរបស់កាណាដា ជាការសងសឹកនឹងការទារពន្ធរបស់ទីក្រុង Ottawa ដែលបានណែនាំកាលពីខែតុលា ហើយនិងបើកការប្រឈមថ្មីនៅក្នុងសង្រ្គាមពាណិជ្ជកម្មបង្កឡើងដោយសារការគំរាមកំហែងដំឡើងពន្ធរបស់ប្រធានាធិបតីសហរដ្ឋអាមេរិកលោក Donald Trump ។

ការទារពន្ធដែលត្រូវបានប្រកាសដោយក្រសួងពាណិជ្ជកម្មចិន និងកំណត់ឲ្យចូលជាធរមាននៅថ្ងៃទី ២០ ខែមីនាខាងមុខ គឺជាការសងសឹកការដំឡើងពន្ធនាំចូល ១០០ភាគរយ និង ២៥ភាគរយដែលកាណាដា ដាក់លើរថយន្តអគ្គិសនីផលិតនៅចិន និងដែកថែប ហើយនិងផលិតផលអាលុយមីញ៉ូម កាលពីរយៈពេលជាង ៤ខែមុន ។

ដោយមិនបញ្ចូលប្រេងរុក្ខជាតិ Canola ដែលស្ថិតក្នុងចំណោមការនាំចេញកំពូលរបស់កាណាដា ទៅកាន់ប្រទេសនាំចូលកសិកម្មលេខ ១របស់ពិភពលោកមួយនេះ មុនពេលចិនបើកការស៊ើបអង្កេតលើករណីប្រឆាំងការលក់បង្ខូចតម្លៃ ទីក្រុងប៉េកាំង អាចបន្តបើកទ្វារសម្រាប់កិច្ចពិភាក្សាពាណិជ្ជកម្ម ។

ក្រុមអ្នកវិភាគនិយាយថា ទោះបីជាយ៉ាងណាក៏ដោយ ការដំឡើងពន្ធនេះ គឺជាការបាញ់ព្រមានមួយផងដែរ ក្នុងនោះរដ្ឋបាលរបស់លោក Trump បានបង្ហាញសញ្ញារួចទៅហើយថា ពួកគេអាចបន្ធូរបន្ថយការទារពន្ធនាំចូល ២៥ភាគរយដែលសេតវិមានគំរាមកំហែងកាណាដា និងម៉ិកស៊ិក បើសិនជាពួកគេអនុវត្តតាមការទារពន្ធបន្ថែម ២០ភាគរយ ដូចដែលលោក Trump បានដាក់លើទំនិញចិន ជុំវិញលំហូរសារធាតុញៀនហ្វេតានីល ៕