រយៈពេល ៥ឆ្នាំកន្លងផុតទៅ បន្ទាប់ពីអង្គការសុខភាពពិភពលោក WHO បានពណ៌នាជាលើកដំបូងអំពីការផ្ទុះឡើងនៃមេរោគកូវីដ១៩ ថាជាជំងឺរាតត្បាតធ្ងន់ធ្ងរ ឥទ្ធិពលអវិជ្ជមានរបស់វីរុសនេះនៅតែបន្តកើតមានយ៉ាងរឹងរូសនៅលើសេដ្ឋកិច្ចពិភពលោក។

ជំងឺកូវីដ១៩ និងកិច្ចតខំប្រឹងប្រែងដើម្បីទប់ស្កាត់វីរុសនេះ បានបង្កឱ្យបំណុលរដ្ឋាភិបាលនានាឡើងខ្ពស់ដល់កម្រិតកំណត់ត្រា ប៉ះពាល់ដល់ទីផ្សារការងារ និងផ្លាស់ប្តូរឥរិយាបថអ្នកប្រើប្រាស់។ វិសមភាពបានកើនឡើង ខណៈការងារពីចម្ងាយ ការទូទាត់តាមឌីជីថល និងការផ្លាស់ប្តូរគំរូនៃការធ្វើដំណើរ បានបន្តស៊ូទ្រាំយ៉ាងរឹងមាំ។

ទោះបីជាភាពតក់ស្លុតភ្លាមៗបានកន្លងផុតទៅច្រើនឆ្នាំហើយក៏ដោយ ឥទ្ធិពលរបស់កូវីដ១៩ នៅតែបន្តកែប្រែសេដ្ឋកិច្ច និងទីផ្សារពិភពលោកឡើងវិញ។ បន្ទាប់ពីប្រទេសនានាបានខ្ចីប្រាក់ដើម្បីការពារសុខុមាលភាព និងជីវភាពរស់នៅរបស់ប្រជាជន បំណុលរបស់រដ្ឋាភិបាលពិភពលោកបានកើនឡើង ១២% ចាប់តាំងពីឆ្នាំ២០២០មក ជាមួយនឹងសន្ទស្សន៍កំណើនបំណុលកំពុងងើបឡើងនៅក្នុងទីផ្សារ។

ជំងឺរាតត្បាតនេះក៏បានជំរុញឱ្យមានអតិផរណាកម្រិតខ្ពស់ ដែលជាក្ដីបារម្ភដ៏ធំបំផុតមួយនៅក្នុងការបោះឆ្នោតសហរដ្ឋអាមេរិក ឆ្នាំ២០២៤ ។ ជំរុញដោយការចំណាយខ្ពស់ក្រោយការបិទខ្ទប់ កញ្ចប់ជំរុញទឹកចិត្តរបស់រដ្ឋាភិបាលនានា កង្វះកម្លាំងពលកម្ម ព្រមទាំងវត្ថុធាតុដើមផ្សេងៗ បានជំរុញអតិផរណាឱ្យឡើងដល់កម្រិតកំពូលក្នុងប្រទេសជាច្រើននៅឆ្នាំ២០២២។

ដើម្បីទូទាត់កំណើនតម្លៃទំនិញ ធនាគារកណ្តាលពិភពលោកបានដំឡើងអត្រាការប្រាក់ ទោះបីជាល្បឿននៃអន្តរាគមន៍របស់ពួកគេមានការប្រែប្រួលយ៉ាងទូលំទូលាយក៏ដោយ។ ការធានាទំនុកចិត្តរដ្ឋផ្នែកឥណទាន ដែលឆ្លុះបញ្ចាំងពីសមត្ថភាពរបស់ប្រទេសមួយក្នុងការទូទាត់សងបំណុលរបស់ខ្លួន ត្រូវបានទម្លាក់ឱ្យទាបជាងមុខ ខណៈសេដ្ឋកិច្ចត្រូវប៉ះពាល់ ហើយរដ្ឋាភិបាលបានយកបំណុលបន្ថែមយ៉ាងច្រើន ដើម្បីបំពេញចម្លោះប្រហោងដែលនៅសេសសល់ក្នុងហិរញ្ញវត្ថុសាធារណៈ៕