ប្រព័ន្ធផ្សព្វផ្សាយរដ្ឋបានរាយការណ៍ថា យោធាចិន បានប្ដេជ្ញានៅថ្ងៃអាទិត្យ (០៩ មីនា) នេះថា ខ្លួននឹងរឹតបន្តឹង "ស្ថានភាពលំបាក" ឱ្យកាន់តែខ្លាំងឡើងជុំវិញកោះតៃវ៉ាន់ ប្រសិនបើគំនិតផ្ដាច់ខ្លួននិយមនៅលើកោះនេះបន្តកើនឡើង ដោយព្រមានអ្នកគាំទ្រគំនិតទាំងនោះឱ្យដើរថយក្រោយចេញពី "មាត់ជ្រោះ" បើមិនដូច្នេះទេនឹងប្រឈមមុខនឹង "ទីបញ្ចប់" ដ៏គ្រោះថ្នាក់។

ទីក្រុងប៉េកាំង បានចាត់ទុកកោះស្វ័យគ្រប់គ្រងតៃវ៉ាន់ ថាជាផ្នែកមួយនៃទឹកដីរបស់ខ្លួន ហើយមិនដែលច្រានចោលការប្រើប្រាស់កម្លាំងយោធាដើម្បីនាំយកតំបន់នេះមកស្ថិតនៅក្រោមការគ្រប់គ្រងរបស់ខ្លួនឡើយ។ ចិន បានបង្កើនសម្ពាធលើអាជ្ញាធរកោះតៃវ៉ាន់ក្នុងប៉ុន្មានឆ្នាំថ្មីៗនេះ ជាមួយនឹងសមយុទ្ធយោធា និងការបញ្ជូនយន្តហោះចម្បាំង និងនាវាកងទ័ពជើងទឹកជាញឹកញាប់នៅជុំវិញកោះ។

សារព័ត៌មានស៊ីនហួ បានរាយការណ៍ថា អ្នកនាំពាក្យយោធាចិន លោក Wu Qian បានព្រមានថា "បើគំនិតផ្ដាច់ខ្លួននៃ 'ឯករាជ្យតៃវ៉ាន់' កាន់តែខ្លាំងឡើង នោះខ្សែចំណងដ៏លំបាកជុំវិញករបស់ពួកគេក៏កាន់តែតឹងដែរ ហើយដាវដែលព្យួរនៅលើជនផ្ដាច់ខ្លួនទាំងនោះនឹងកាន់តែមុតស្រួច"។

ការអត្ថាធិប្បាយនេះ បានធ្វើឡើងក្នុងអំឡុងពេលជំនួបផ្នែកនយោបាយប្រចាំឆ្នាំ "ពីរវគ្គ" របស់ចិន ហើយក៏បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីទីក្រុងប៉េកាំងបានប្រកាសពីការដំឡើងថវិកាការពារជាតិរបស់ខ្លួនចំនួន ៧,២% ក្នុងឆ្នាំ២០២៥ នេះ៕