ក្រសួងការពារជាតិរុស្ស៊ី បាននិយាយថា កងកម្លាំងទីក្រុងមូស្គូ កាលពីថ្ងៃអាទិត្យ (០៩ មីនា) បានវាយដណ្តើមយកមកវិញនូវទីតាំងឈរជើងចំនួន៣ បន្ថែមទៀតនៅក្នុងតំបន់ Kursk ភាគខាងលិចរបស់រុស្ស៊ី ដែលជាផ្នែកនៃប្រតិបត្តិការបណ្តេញទាហានអ៊ុយក្រែនដែលកាន់កាប់ទឹកដីនោះ រយៈពេល ៧ខែបន្ទាប់ពីការវាយលុកឆ្លងព្រំដែន។

សេចក្តីថ្លែងការណ៍របស់ក្រសួងលើកម្មវិធីផ្ញើសារតេលេក្រាម ដែលកើតឡើងបន្ទាប់ពីរបាយការណ៍របស់អ្នកសរសេរប្លុករុស្ស៊ី បានលើកឡើងថា កងកម្លាំងពិសេសរុស្ស៊ី បានវាយរុញរាប់គីឡូម៉ែត្រតាមបំពង់បង្ហូរឧស្ម័ននៅជិតទីក្រុង Sudzha ក្នុងការប៉ុនប៉ងធ្វើឱ្យកងកម្លាំងអ៊ុយក្រែន ភ្ញាក់ផ្អើល និងបណ្ដេញទាហានទីក្រុងគីវ ចេញពីតំបន់នោះទាំងស្រុង។

ក្រសួងបន្តថា តំបន់តាំងទីលំនៅទាំង ៣នោះ ឥឡូវនេះស្ថិតនៅក្រោមការគ្រប់គ្រងរបស់រុស្ស៊ី ពោលគឺតំបន់ Malaya Lokhnya តំបន់ Cherkasskoye Porechnoye និង Kositsa ដែលទាំងអស់នេះស្ថិតនៅភាគខាងជើងនៃក្រុង Sudzha។

កងទ័ពអ៊ុយក្រែន បានរឹបអូសយកទឹកដីប្រមាណ ១.៣០០គីឡូម៉ែត្រក្រឡា នៃតំបន់ Kursk របស់រុស្ស៊ី កាលពីខែសីហា នៅក្នុងអ្វីដែលក្រុងគីវនិយាយថា ជាការប៉ុនប៉ងដើម្បីទទួលបានថ្នូរចរចានាពេលអនាគត និងបង្ខំឱ្យរុស្ស៊ី ផ្លាស់ប្តូរកងកម្លាំងពីភាគខាងកើតអ៊ុយក្រែន៕