របាយការណ៍ដែលចេញផ្សាយដោយក្រុមស្រាវជ្រាវអំពីជម្លោះឈានមុខគេ នៅថ្ងៃចន្ទ (១០ មីនា) នេះបានឱ្យដឹងថា ការនាំចូលសព្វាវុធរបស់អឺរ៉ុប បានកើនឡើងខ្ពស់ខ្លាំងចំនួន ១៥៥% ក្នុងពេល ៤ឆ្នាំចុងក្រោយនេះ ពោលគឺពីឆ្នាំ២០២០-២០២៤ ហើយអ៊ុយក្រែន បានក្លាយជាប្រទេសនាំចូលអាវុធធំបំផុតរបស់ពិភពលោក បន្ទាប់ពីប្រតិបត្តិការយោធារបស់រុស្ស៊ី ក្នុងឆ្នាំ២០២២។

ទិន្នន័យពីវិទ្យាស្ថានស្រាវជ្រាវសន្តិភាពអន្តរជាតិ Stockholm ហៅកាត់ថា SIPRI បង្ហាញថា សហរដ្ឋអាមេរិកបានបន្តគ្របដណ្តប់លើឆាកពិភពលោក ជាមួយនឹងក្រុមហ៊ុនអាមេរិកជាអ្នកនាំចេញអាវុធលំដាប់ពិភពលោកដល់ ៤៣% ក្នុងឆ្នាំ២០២០-២៤ ឡើងលើសពីតួលេខ ៣៥% ក្នុងឆ្នាំ២០១៥-២០១៩។

SIPRI និយាយថា អឺរ៉ុបទាំងមូលមានចំណែក ២៨% នៃការនាំចូលអាវុធសកលពីឆ្នាំ២០២០-២៤ ដោយកើនឡើងពីតួលេខ ១១% ចន្លោះឆ្នាំ២០១៥ និង ២០១៩។ អ៊ុយក្រែន តែឯកឯងប៉ុណ្ណោះ មានចំណែកដល់ទៅ ៨,៨% នៃការនាំចូលអាវុធពិភពលោកក្នុងទម្រង់ឆ្នាំ២០២០-២៤ ហើយតិចជាងពាក់កណ្តាលនៃការនាំចូលទាំងនោះគឺមកពីអាមេរិក។

ទិន្នន័យ SIPRI បង្ហាញថា អាមេរិកបានផ្គត់ផ្គង់ច្រើនជាង ៥០% នៃការនាំចូលអាវុធរបស់អឺរ៉ុប ចាប់ពីឆ្នាំ២០២០-២៤ ដោយមានចក្រភពអង់គ្លេស ហូឡង់ និងន័រវេស ក្នុងចំណោមអ្នកទិញលំដាប់កំពូល។ ចំណែកការនាំចេញអាវុធរបស់រុស្ស៊ីវិញបានធ្លាក់ចុះមកត្រឹម ៧,៨% នៃទីផ្សារពិភពលោកក្នុងឆ្នាំ២០២០-២៤ ធៀបនឹងតួលេខ ២១% ក្នុងពេល ៤ឆ្នាំមុននោះ ដែលជាលទ្ធផលនៃទណ្ឌកម្មអន្តរជាតិជុំវិញសង្រ្គាមអ៊ុយក្រែន និងកំណើនតម្រូវការអាវុធក្នុងស្រុក៕