លោកប្រធានាធិបតី Donald Trump បានបដិសេធកាលពីថ្ងៃអាទិត្យ ៩ មីនា ក្នុងការច្រានចោលពីលទ្ធភាពដែលថាសហរដ្ឋអាមេរិកអាចធ្លាក់ចូលទៅក្នុងវិបត្តិសេដ្ឋកិច្ចនៅឆ្នាំ២០២៥នេះដោយសារការដំឡើងពន្ធរបស់លោក។

លោកបានប្រាប់អ្នកសម្ភាសន៍ក្នុងកម្មវិធីព័ត៌មានរបស់ទូរទស្សន៍ Fox News នៅពេលសួរដោយផ្ទាល់អំពីវិបត្តិសេដ្ឋកិច្ចដែលអាចកើតមាននៅឆ្នាំ២០២៥ ថា លោកស្អប់ការទស្សន៍ទាយរឿងបែបនេះ។

លោកបាននិយាយថា មានរយៈពេលនៃការផ្លាស់ប្តូរមួយ ព្រោះអ្វីដែលយើងកំពុងធ្វើគឺធំណាស់ យើងកំពុងនាំយកទ្រព្យសម្បត្តិត្រឡប់មកកាន់សហរដ្ឋអាមេរិកវិញ ដោយលោកបានបន្ថែមថា វាត្រូវការពេលវេលាបន្តិច ។

រដ្ឋមន្ត្រីក្រសួងពាណិជ្ជកម្មរបស់លោក Trump លោក Howard Lutnick មានភាពច្បាស់លាស់ជាងនេះ នៅពេលត្រូវបានសួរកាលពីថ្ងៃអាទិត្យអំពីលទ្ធភាពនៃការធ្លាក់ចុះសេដ្ឋកិច្ច។

លោកបានប្រាប់កម្មវិធី"Meet the Press" របស់ទូរទស្សន៍ NBC នៅពេលសួរថាតើជនជាតិអាមេរិកគួរតែទប់ទល់នឹងការធ្លាក់ចុះដែរឬទេ ថា ពិតជាមិនចាំបាច់ទេ។

ការគំរាមដំឡើងពន្ធលើទំនិញជាថ្មី របស់ Trump លើប្រទេសកាណាដា ម៉ិកស៊ិក ចិន និងប្រទេសដទៃទៀត បានធ្វើឱ្យទីផ្សារហិរញ្ញវត្ថុរបស់សហរដ្ឋអាមេរិកស្ថិតក្នុងភាពចលាចល ហើយអ្នកប្រើប្រាស់មិនច្បាស់ថាតើឆ្នាំនេះនឹងនាំមកនូវអ្វីសម្រាប់ប្រជាជនអាមេរិក។

ប្រជាពលរដ្ឋអាមេរិក ភាគច្រើនរំពឹងថាអតិផរណានឹងកើនឡើងខ្ពស់ថែមទៀត កើតចេញពីការដំឡើងពន្ធរបស់លោក Trump។ ក្រុមសេដ្ឋវិទូរួមជាមួយស្ថាប័នស្រាវជ្រាវ Morgan Stanley Research បាននិយាយនៅក្នុងរបាយការណ៍មួយកាលពីថ្ងៃសុក្រសប្ដាហ៍មុនថា ពួកគេរំពឹងថាអតិផរណានៅឆ្នាំ ២០២៥ នឹងហក់ឡើង២,៥ % កើនឡើងពីការព្យាករណ៍កាលពីកន្លងទៅរបស់ពួកគេក្នុងខែធ្នូ២,៣% ៕