​បាល់ទាត់៖ ក្រុមបាល់ទាត់​ជម្រើស​ជាតិ​កម្ពុជានឹង​ចាប់ផ្ដើម​ប្រមូលផ្ដុំ​ហ្វឹកហាត់ ក្រោយ​បញ្ចប់​ការប្រកួត​ពានរង្វាន់​ស​ម្ដេច​តេ​ជោ ហ៊ុន សែន លើក​ទី​១៥ (​ថ្នាក់ជាតិ​) ១​ថ្ងៃ ពោលគឺ​ចាប់ពី​ថ្ងៃទី​២៦ ខែវិច្ឆិកា​ស្អែក ស្របពេល​វគ្គ​ផ្ដាច់ព្រ័ត្រ​ពានរង្វាន់​សម្ដេច​តេ​ជោ​នាយករដ្ឋមន្ដ្រីនឹង​ប្រកួត​ល្ងាច​នេះ រវាង​ក្រុម​ព្រះខ័ន​រាជ​ស្វាយរៀងជាមួយ​វិសាខា។​

​តាម​ការបញ្ជាក់​របស់​មន្ដ្រី​សហព័ន្ធ​កីឡាបាល់ទាត់​កម្ពុជាបាន​ឲ្យ​ដឹងថា ក្រុម​ជម្រើសជាតិ​កម្ពុជានឹង​ចាប់ផ្ដើម​ប្រមូលផ្ដុំ​ហ្វឹកហាត់នៅ​ថ្ងៃស្អែក​នេះ ដើម្បី​ត្រៀម​ចូលរួម​ការប្រកួត​ពាន​រង្វាន់ AFF Suzuki Cup 2020 នៅ​ប្រទេស​សិង្ហ​បុរី ដែល​នឹងធ្វើ​ការប្រកួត​ពីថ្ងៃ​ទី​៥ ខែធ្នូ ឆ្នាំ​២០២១ ដល់​ថ្ងៃទី​០១ ខែមករា ឆ្នាំ​២០២២ ខាងមុខ។​ ​តាមរយៈ​នេះ ក្រុម​គោព្រៃ​កម្ពុជាមាន​ពេល​ប្រមូលផ្ដុំ​ហ្វឹកហាត់​ក្នុងស្រុក ៥​ថ្ងៃមុន​ឡើង​យន្ដហោះ​ទៅ​សិង្ហ​បុរី ដែល​ក្រុម​ជម្រើសជាតិ​កម្ពុជានឹងត្រូវ​ចាកចេញ​ពី​មាតុភូមិនា​ថ្ងៃទី​០១-​ធ្នូ ពោលគឺ​មុន​ការប្រកួត​បើកឆាក​ពូ​ល B រយៈពេល ៥​ថ្ងៃដែល​កម្ពុជានឹងត្រូវ​ជួប​ក្រុម​ជម្រើសជាតិ​ម៉ាឡេស៊ីនា​ថ្ងៃទី​០៦ ខែធ្នូ ឆ្នាំ​២០២១ ខាងមុខ។​

​ចំពោះ​សមាសភាព​ក្រុម​ជម្រើសជាតិ​កម្ពុជា ក្រោម​ការដឹកនាំ​របស់​អ្នកចាត់ការ​ទូទៅ​លោក Keisuke Honda និង​គ្រូបង្វឹក​លោក Ryu Hirose បាន​កោះហៅ​កីឡាករ​ចំនួន ៣០​នាក់ដើម្បី​ធ្វើការ​ប្រមូលផ្ដុំ​ហ្វឹកហាត់ និង​ត្រៀម​ការប្រកួត AFF Suzuki Cup 2020 នាពេល​ឆាប់ៗ​ខាងមុខ។​ ​សូម​រំ​លឹកថា បេសកកម្ម​ក្នុងការ​ប្រកួត​ដ៏​ធំ​ប្រចាំ​តំបន់​នេះ កម្ពុជា​ស្ថិតក្នុង​ពូ​ល B ជាមួយ​វៀតណាម ម៉ាឡេស៊ី ឥណ្ឌូនេស៊ី និង​ឡាវ ខណៈ​ពូ​ល A មាន ៥​ក្រុម​ដូចគ្នារួមមាន​ថៃ មី​យ៉ាន់​ម៉ា ហ្វីលីពីន ទី​ម័​រ​ខាងកើត និង​ក្រុម​ម្ចាស់ផ្ទះ​សិង្ហ​បុរី៕

​អត្ថបទ៖ លី ឈុន​ឡា